मिडियामे आदिवासी जनजातिनके सवाल उठान कैना जोड
पहुरा समाचारदाता
सुखड, २७ सावन । नेपाल आदिवासी जनजाति पत्रकार महासंघ(फोनिज)के २६औं स्थापना दिवस मंगरके घोडाघोडी नगरपालिकाके सुखडमे मनागिल बा ।
स्थापना दिवसके अवसरमे ‘पत्रकारितामे जनजातिके सवाल’ विषयक अन्तरक्रिया कार्यक्रममे ओइसीन जोड डेहल हो । कार्यक्रमके बर्का पहुना तथा नेपाल आदिवासी जनजाति पत्रकार महासंघ (फोनिज)के सुदूरपश्चिम प्रदेश इन्चार्ज लखन चौधरी मिडियामे आदिवासी जनजाति समुदायके सवाल उठान करे पर्ना बटाइल रहिट ।
उहाँ आदिवासी जनजाति शिक्षा, स्वास्थ्य, रोजगारी लगायत राजनैतिक रुपमे अन्य समुदायसे पाछे परल ओरसे उ विषयमे कलम चलाई पर्ना औंल्याइटी आदिवासी जनजातिहुक्रनके कला, संस्कृति, टरटिहुवार ओ पहिचानसे जोरल सक्कु चिजहे बचाई पर्ना फेन जोड डेहल रहिट ।
ओस्टके आदिवासी जनजाति पत्रकारहुक्रनहे उहाँ आपन क्षमता अभिवृद्धिके लाग स्वअध्ययन करे पर्ना बटाइल रहिट ।
फोनिजके पूर्व प्रदेश इन्चार्ज भीम चौधरी पत्रकारिता क्षेत्रमे अब्बेक अवस्थामे ढेर चुनौती रहल बटाइल रहिट । उहाँ सामाजिक सञ्जाल फेसबुक, अनलाइनसे टमान पत्रकारहुक्रनहे चुनौटी थपल बटैटी उहे अनुसार आपन स्कील बह्राइ पर्ना जोड डेहल रहिट ।
फोनिज प्रदेश अध्यक्ष उन्नती चौधरी आदिवासी जनजाति पत्रकारहुक्रनके क्षमता अभिवृद्धिके लाग स्थानीय तहसे समन्वय ओ सहकार्य कैटी तालिम सञ्चालन कैना बटाइल रही । ओस्टके उहाँ आदिवासी जनजाति पत्रकारहुक्रनके हक अधिकारके लाग एकजुट हुइ पर्ना फेन बटाइल रही ।
फोनिज प्रदेश सचिव हरेन्द्र चौधरी आदिवासी जनजाति पत्रकारहुक्रनसे सञ्चालन करल मिडिया तथा पत्रकारहुक्रनके क्षमता अभिवृद्धि कैना आवश्यक रहल बटाइल रहिट ।
फोनिज कैलाली जिल्ला अध्यक्ष राम दहित आदिवासी जनजाति पत्रकारहुक्रनके क्षमता अधिवृद्धिके लाग तालिम लगायत कार्यक्रमके लाग स्थानीय सरकार ओ प्रदेश सरकारसे समन्वय सहकार्य कैके आघे बह्रना बटाइल रहिट ।
घोडाघोडी एफएमके सञ्चालक स्वरुप चौधरी अनलाइन मिडियाके कारण अब्बे एफएम रेडियो विस्थापित हुइना अवस्थामे पुगल बटैटी एफएम रेडियोहे फेन बचैना आवश्यक रहल बटाइल रहिट ।
थारुनके डटकमके सञ्चालक रामप्रसाद चौधरी समय अनुसार आपनहे अनलाइन पत्रकारिता ओर फेन दक्ष बने पर्ना बटाइल रहिट ।
कठरिया सन्देश पत्रिकाके सम्पादक टिआर कठरिया भाषिक पत्रिका चलैना चुनौटी रहल बटाइल रहिट ।
पहुरा थारु दैनिकके पहलमानपुर ब्युरो प्रमुख जीवन चौधरी पत्रकारहुक्रनके दक्षता अभिवृद्धिके लाग तालिमके आवश्यक रहल बटाइल रहिट ।
कार्यक्रममे हरचालि त्रैमासिकके सम्पादक सागर कुश्मी लावा अउइया पत्रकारहुक्रनके लाग फोनिजसे विशेष कार्यक्रम सञ्चालन करे पर्ना जोड डेहल रहिट ।
कार्यक्रममे जोशीपुर साप्ताहिकके सम्पादक सुधराम दहित, अँख्वारी साप्ताहिकके दशीराम चौधरी, चौधरी मिडिया प्रालिके कालुराम चौधरी फेन क्षमता अभिवृद्धिके लाग तालिमके आवश्यकतामे जोड डेहल रहिट ।
फोनिज सुदूरपश्चिम प्रदेश अध्यक्ष उन्नती चौधरीके घरगोसियाइमे हुइल कार्यक्रमके सञ्चालन महासचिव भानुप्रताप राना करल रहिट ।
