लैङिक हिंसा, बालविवाह तथा कानून कार्यान्वयनके अवस्थाबारे संवाद

पहुरा समाचारदाता
धनगढी, २७ सावन । लैङिक हिंसा, बालविवाह तथा कानून कार्यान्वयनके अवस्था विषयमे जिल्ला स्तरीय संवाद कार्यक्रम सम्पन्न हुइल बा ।

दलित महिला अधिकार मञ्च कैलालीके आयोजनामे हुइल कार्यक्रममे जिल्ला समन्वय समिति कैलालीके सभापति टीका कुमारी चौधरी भुल प्रमुख अतिथि रहल रहिट । कार्यक्रममे सम्बोधन करटी अधिकार प्रदान करेक लाग टमान कानून निर्माण हुइल मने कार्यान्वयन नैहुके न्याय पैना व्यक्ति न्यायसे बञ्चित रहल बटैली ।

उहाँ अनुभव सुनैटी अभिन महिलाहुकनहे फरक दृष्टिकोणसे हेर्ना करल कारण महिला उप्पर उठे नैसेकल बटैली । लैङिक हिंसा, बालविवाहके घटनामे बृद्धि हुइल मने बनल कानून कार्यान्वयन नैहोके न्युनिकरण, न्यायमे पहुँच पुगैना समस्य बह्रल सभापति बटैली ।

जिल्ला अदालत कैलालीके निमित्त श्रेष्टेदार देवान सिंह लोहार कानूनी जटिलताके कारण ढेर यूवा बलात्कारके मुद्दामे जेल जीवन विटैटी रहल बटैलै । उहाँ कहलै, १८ बरस टरेक उमेर समुहहे बालबालिका कहिके परिभाषा करल बा मने, भोज कैना उमेर २० बर्ष तोकल बा । यी विचमे यूवा यूवती भागके भोज करलबेला ढेर जैसिन बलात्कार मुद्दा लागल बा ।

कार्यक्रममे राष्ट्रिय मानव अधिकार आयोग सुदूरपश्चिम प्रदेश कार्यालयके प्रमुख प्रकाश भट्ट लैङिक हिंसा, बालविवाह तथा कानून कार्यान्वयनके अवस्था विषयमे प्रस्तुतीकरण करल रहिट । उहाँ हकअधिकारके लाग अभिनसम बनल टमान कानून ओकर अवस्था, मौलिक हकबारे, बनल कानूनके कार्यान्वयन, कानून कार्यान्वयन नैहुके हुइटी रहल हिंसाबारे प्रस्तुतीकरण करल रहिट ।

दलित महिला अधिकार मञ्चके अध्यक्ष सावित्रा घिमिरेके अध्यक्षतामे हुइल कार्यक्रममे उहाँ लैङिक हिंसा, बलात्कारमे परल, अन्याय विभेदमे परल महिला न्यायके पहुँचसे बञ्चित हुइल बटैली । पीडितहुक्रे न्यायके ढोकसम पुगेबेरफे सहजरुपमे न्याय नैपाइल अध्यक्ष बटैली ।

कार्यक्रममे मञ्चके कार्यक्रम संयोजक सृजना पराजुली मञ्चसे लैङिक हिंसामे परल महिला तथा बालबालिका, जातीय विभेद, सुशासन, जलबायू परिवर्तनसे महिलाहुकनके पारल असरबारे काम करटी रहल बटैली । लैङिक ंिहसाके घटना बह्रटी रहल, न्यायके अवस्था कम्जोर, बालविवाहके घटना बह्रटी, कुप्रथा जन्य गलत परम्पराके अभ्यास हुइल ओरसे ंिहसामे परल महिला आर्थिक पाटोसे जोरना प्रयास करल उहाँ बटैली ।

कार्यक्रमके संचालन दलित महिला अधिकार मञ्चके विमला कडायत करल रहिट । उ कार्यक्रममे सरोकारवाला निकाय, टमान संघसंस्थाके प्रतिनिधिहु्कनके सहभागिता रहे ।