किसानके श्रमके मूल्यांकन नैहोः डा. रावल
पहुरा समाचारदाता
धनगढी, २८ सावन । नेपाल किसान महासंघ सुदूरपश्चिम प्रदेश समितिके पहिल महाधिवेशन बुधके रोजसे कैलालीके धनगढीमे सुरु हुइल बा ।
“आपन देशके उत्पादन, आपन सान, कृषि उन्नतीमे हमार अभियान” कना मूलनाराके साथ महाधिवेशनके सुरु हुइल हो ।
उदघाटन शत्रमे नेपाली कांग्रेसके केन्द्रीय सदस्य डा.रणबहादुर रावल प्रमुख अतिथि रहल रहिट । कार्यक्रममे सम्बोधन करटी उहाँ किसानके श्रमके उचित मूल्य बिना राष्ट्रके समृद्धि सम्भव नैरहल बटैलै ।
सुदूरपश्चिमके कृषि सम्भावनाहे आत्मनिर्भर अर्थतन्त्रके आधार बनाई परल, उहाँ कहलै, “हिउँले छोपल हिमालसे तराईके उर्वर खेतसमके वरदानहे संगठन, नीति ओ प्रविधिके संयोजनमार्फत परिणाममे बडले परठ ।
उहाँ स्व. शहिद भीमदत्त पन्तके कहाई “कि त जोत हलो, कि त छोड थलो, यदि होइन भने छैन भलो” उद्धृत करटी किसान आन्दोलनके ऐतिहासिक पृष्ठभूमि स्मरण करलै ।
नेपाली कांग्रेसके केन्द्रीय सदस्य नृपबहादुर वड सुदूरपश्चिमहे जैविक उत्पादनके अग्रणी प्रदेश बनैना दीर्घकालीन रणनीति आवश्यक रहल बटैलै । केन्द्रीय सदस्य शुशिला मिश्र भट्ट महिला किसानहे विशेष प्रशिक्षण, ऋण सुविधा ओ बजार पहुँच डेहुवइना कार्यक्रम प्राथमिकतामे पारेपर्ना धारणा रख्ली ।
महासंघके केन्द्रीय अध्यक्ष गणेशचन्द्र तिमिल्सेना किसानके हक अधिकारके संरक्षण, बीउ–मल आपूर्ति सुधार, सहकारीमार्फत बजार व्यवस्थापन ओ कृषि यान्त्रीकरणहे महासंघके प्रमुख एजेन्डा बनैना बटैलै ।
नेपाली कांग्रेस कैलाली जिल्ला सभापति तथा राष्ट्रिय सभा सदस्य नारायणदत्त भट्ट सक्कु तहके सरकारसे सिंचाइ विस्तार, कृषि उद्यमशीलता प्रवद्र्धन ओ उत्पादनके मूल्य सुनिश्चित कैना तत्काल पहल करेपर्नामे जोर डेलै ।
कार्याक्रमके वक्ताहुक्रे सुदूरपश्चिममे हाल ३४ हजार ६३० हेक्टर क्षेत्रमे केल्ह सिंचाइ पुगल बा, पहाडी क्षेत्रमे आधासे ढेर खेतीयोग्य जमिन बाँझ बा, ओ श्रमिक पलायनके कारण गाउँके खेत खाली रहल बटै । मने, प्रविधि ओ सुधारल खेती प्रणालीके कारण उत्पादनमे वार्षिक ०.९ प्रतिशत वृद्धि डेखल बा, जिहीहे अभिन तीव्र बनाई सेक्ना उल्लेख करल रहिट ।
अधिवेशनसे सुदूरपश्चिमहे आत्मनिर्भर कृषि प्रदेश बनैना नीतिगत, संगठनात्मक ओ व्यवहारिक अभियानहे सुदृढ कैना संकल्प लेहल बा । यिहेबीच, बन्द सत्रसे सर्व सम्मत नयाँ प्रदेश समिति चयन कैना महासंघके अध्यक्ष हरेन्द्र सिंह बिष्ट बटैलै । बन्दसत्रमे सुदूरपश्चिम प्रदेशके ९ जिल्ला प्रतिनिधिहुकनके सहभागिता रहल बा ।
