कैलारी–७ मे निशुल्क आँखी जाँच शिविर
पहुरा समाचारदाता
धनगढी, ३१ सावन । कैलाली जिल्लाके कैलारी गाउँपालिका वडा नम्बर ७ मे रहल शनिच्चर रोज निशुल्क आँखी जाँच शिविर सम्पन्न हुइल बा ।
मानव धर्म सेवा समिति कैलारी–७ भुइयाफाँटा ओ गेटा आँखा अस्पताल धनगढीके आयोजनामे निशुल्क आँखी जाँच शिविर हुइल हो । शिविरके उदघाटन कैलारी गाउँपालिकाके उपाध्यक्ष भगवतीकुमारी चौधरीके बरका पहुनामे हुइल हो । कार्यक्रममे सम्बोधन करटी उहाँ आँखी मानबके महत्वपूर्ण अंग रहल ओरसे उहीहे ध्यान डेना जरुरी रहल बटैली । उहाँ मानव धर्म सेवा समिति कैलारी–७ भुइयाफाँटा ओ गेटा आँखा अस्पताल धनगढीके आयोजनामे निशुल्क आँखी जाँच शिविर संचालन कैलकमे धन्यावाद ज्ञापन करली ।
कैलारी गाउँपालिकासे समय समयमे टमान मेरिक शिविर संचालन करटी आइल बा, उ शिविरमे ग्रामीण ठाउँके जनता सेवा पाइल उहाँ बटैलै । विगतके बरसफे निशुल्क आँखी शिविर संचालन करके ढेर जाने निशुल्क आँखीक अप्रेशन सेवा लेहल गाउँपालिका उपाध्यक्ष बटैली ।
निशुल्क आँखी शिविरमे कैलारी गाउँपालिकाके प्रवक्ता तथा वडा नम्बर ७ के वडाध्यक्ष दिपेन्द्रबहादुर बम, कार्यपालिका सदस्य सुन्दरीदेवी चौधरी विशिष्ट पहुना रहिट ।
