भादामे अष्टिम्की चित्रकला लेखन तथा अभ्यास
पहुरा समाचारदाता
धनगढी, ३१ सावन । कैलाली जिल्लाके धनगढी उपमहानगरपालिका वडा नम्बर १६ भादामे दुई दिने अष्टिम्की चित्रकला लेखन तथा अभ्यास कार्यक्रम निम्जल बा ।
थारू होमस्टे गाउँ भादा पर्यटन विकास तथा व्यवस्थापन समिति धनगढी–१६,भादा कैलालीके आयोजनामे अष्टिम्की (श्रीकृष्ण जन्माष्टमी) टिक्ना कार्यक्रम २०८२ अन्तर्गत लौवा पिढीहे अष्टिम्की चित्रकला लेखन तथा अभ्यासके लाग तालिम डेहल हो ।
दीपेन्द्र चारपाते मावि धनगढी–१६, भादामे पह्रना लउण्डा लउण्डीहुँक्रनहे अष्टिम्की चित्रकला लेखन तथा अभ्यास तालिम डेहल सहजकर्ता पदम बहादुर पछल्दंग्या जनैलै । उहाँ कहलै, गाउँमे अष्टिम्की चित्रकला बनाई जन्ना मनै बहुट कम बटै, यूवा पिढीहे चित्रसंगे अष्टिम्कीके बारेमे जानकारी डेना हिसाबसे यी कार्यक्रमके आयोजना कैगिलक हो ।
थारू होमस्टे गाउँ भादा पर्यटन विकास तथा व्यवस्थापन समितिके अध्यक्ष लक्ष्मीनारायण चौधरी लौवा पिढीहे सावन ३० व ३१ गते अष्टिम्की चित्रकला लेखन तथा अभ्यास करागैल जनैलै । वसेहक कैके भादा गाउँमे प्रत्येक बरस सामुहिक अष्टिम्की टिक्ना कार्यक्रमके आयोजना कैटी आइलक उहाँ जनैलै ।
