कैलारी–४ ‘के गाउँ’ मे फुटवल प्रतियोगिता सुरु

पहुरा समाचारदाता
हसुलिया, १ भदौ । कैलाली जिल्लाके कैलारी गाउँपालिका वडा नम्बर ४ स्थित के गाउँके खेल मैदानमे अँटवारके रोजसे पुरुष ओ महिला फुटवल प्रतियोगिता सुरु हुइल बा ।

थारु समुदायमे अँटवारी टिहुवार ओ नेपाली महिलाहुकनके महान पर्व हरितालिका तिजके अवसरमे न्यू युवा सुन्दर शक्ति क्लवके आयोजनामे फुटवल प्रतियोगिता सुरु हुइल हो ।

फुटवल प्रतियोगिताके उदघाटन सुदूरपश्चिम प्रदेश सरकारके सामाजिक विकास मन्त्री माननीय मेघराज खडका करल रहिट । कलेसे प्रतियोगिता उदघाटन कार्यक्रमके विशिष्ट पहुना कैलारी गाउँपालिका अध्यक्ष राजसमझ चौधरी, सुप प्रदेश खेलकुद परिषदके सदस्य सचिव लोकबहादुर खडका, निसर्ग हस्पितल एण्ड रिसर्च सेन्टरके अध्यक्ष तिर्थराज पन्त रहल रहित । प्रतियोगिताके मुख्य प्रवद्र्धकमे कैलारी गाउँपालिका सहायक प्रवद्र्धनमे वडा नम्बर ४ के कार्यालय ओ खास प्रयोजक निसर्ग अस्पताल प्रालि रहल बा ।

प्रतियोगिताके उदघाटन कार्यक्रममे सम्बोधन करटी माननीय मन्त्री खडका गाउँठाउँमे आयोजना हुइना यी मेरिक प्रतियोगितासे गाउँघरमे नुकल प्रतिभाके उजागर हुइना बटैलै । उहाँ कहलै, ‘प्रतियोगितासे गाउँघर हुइटी जिल्ला, प्रदेश, राष्ट्रिय अन्तर्राष्ट्रियस्तरमे अवसर पाके अपन प्रतिभा डेखाई सेक्ठै । सुदूरपश्चिमके भैया बहिनीय चाहे क्रिकेट, फुटवल ओ भलिवल लगायतके क्षेत्रमे आघे बटै ।’

नेपाल खेलकुदके क्षेत्रमे भारी सम्भावना बोक्ले बा । लगानी कम बा । यी क्षेत्रमे जटरा करे पर्ना हो । निजि क्षेत्र होए वा सरकारी क्षेत्रसे । प्रतियोगिता निरन्तरताके कामनाफे करलै ।

न्यू युवा सुन्दर शक्ति क्लवके खेलमैदानमे भौतिक संरचनाके कमी बा । छोट छोट संरचना स्थानीय सरकारसे पुरा करेपरल और संरचना बनााइक लाग प्रदेश सरकार सहयोग कैना प्रतिवद्धता जनैलै ।

कार्यक्रमके विशिष्ट पहुना रहल कैलारी गाउँपालिका अध्यक्ष राजसमझ चौधरी घरेलु टिमहे अवसर प्रदान करेक लाग प्रतियोगिता आयोजना हुइना मजा बाट रहल कहटी गाउँपालिकासे शिक्षा, स्वास्थ्य, कृषिसंगे खेलकुदओर बजेट विनियोजन करटी आइल बटैलै ।

उहाँ कहलै, ‘कैलारी गाउँपालिकाके खेलाडी अब्वल खेलाडीके रुपमे स्थापित हुइटी गैल मने यहाँ खेलमैदानके अभाव रहल बा । खेलकुद प्रतियोगिता तथा खेलकुद सामाग्रीके लाग पालिका प्रत्येक बरस बजेट विनियोजन करटी आइल बा । न्यू युवा सुन्दर शक्ति क्लवके खेलमैदानमे भौतिक संरचना बनाइक लाग डिपिआर तयार करल जनैलै ।

कार्यक्रमके दुसर विशिष्ट पहुना निसर्ग हस्पितल एण्ड रिसर्च सेन्टरके अध्यक्ष तिर्थराज पन्त यूवाहुक्रे लागु औषधके दुव्र्यशनीमे फस्टी गैल बटै खेलकुद प्रतियोगिता हुइलेसे यूवाहुकन यिहे क्षेत्रमे व्यस्त बनैलेसे गलत डगर जैनासे बञ्चित रना बटैलै ।
उहाँ कहलै, ‘खेलकुदसे अनुशासित बनाइठ । देशके विकासमे टेवा पुगाठ । अब्बे यूवा लागु औषधके कुलटमे फस्टी गैल बटै । यूवाहे खेलकुदमे व्यस्ता बनाइ सेक्लेसे देशके विकास, शारिरीक विकासफे हुइठ । उहीहे लागु औषध दुव्र्यशनीफे नियन्त्रण करे सेक्जाई ।’

सुप प्रदेश खेलकुद परिषदके सदस्य सचिव लोकबहादुर खडका खेलकु्दके भौतिक पूर्वधार ओ वातावरण आवश्यक रहल कहटी यी क्लव लम्मा समयसे खेलकुद संचालन करल मने सरकारके ध्यान नैपुगल बटैलै । उहाँ आपन ओरसे जैसिनफे सहयोग कैना प्रतिवद्धता जनैलै ।

कार्यक्रममे कैलारी गाउँपालिका वडा नम्बर ४ के वडा अध्यक्ष ठागुराम चौधरी खेलकुदके माध्यमसे यी वडाहे चिन्हाइल बटैलै । खेलकुद मैदानमे चाहल भौतिक पूर्वाधार निर्माणके लाग माननीय सामाजिक विकास मन्त्रीसे आग्रह करलै ।

कैलाली जिल्ला खेलकुद फुटवल संघके महासचिव ललित मिश्र यहाँ प्रत्येक बरस भारी भारी खेल हुइना मने खेलाडीके लाग पोशाक बडल्न कोठालगायत एक ठो शौचालयसमेट बने नैसेकल दुखद बाट रहल बटैलै ।

आयोजक क्लवके अध्यक्ष बृक्षलाल चौधरीके अध्यक्षतामे हुइल कार्यक्रममे स्वागत मन्तव्य न्यू युवा सुन्दर शक्ति क्लवके खेलकु्द संयोजक देवनारायण चौधरी करल रहिट ।

कार्यक्रममे कैलारी गाउँपालिका वडा नम्बर ३ वडा अध्यक्ष सन्तराम चौधरी, कार्यपालिका सदस्य लालबहादुर विक, वडा सदस्य हरिद्वारी चौधरी, लक्ष्मी चौधरी, शोभा परियार, समाजसेवी, बुद्धिजीवी, टमान राजनितिक दलके प्रतिनिधिलगायत टमान खेलकुद समितिके प्रतिनिधि, वडा नम्बर ४ अन्र्तगतके भल्मन्साहुकनके सहभागिता रहे । कार्यक्रमके संचालन सुनिता चौधरी करल रहिट ।

भदौ १२ गतेसम हुइना प्रतियोगितामे १६ ठो पुरुष टिम ओ आठ ठो महिला फुटवल टिम भाग लेले बटै । जेम्ने पुरुष ओर पहिल हुइना टिमहे ९९ हजार ९ सय ९९ रुप्या, दुसराहे ४९ हजार ९ सय ९९ रुप्या पुरस्कारके व्यवस्था करल बा । कलेसे महिला फुटवल ओर पहिल पुरस्कार २५ हजार, दुसरा पुरस्कार १५ हजार व्यवस्था करल क्लवके अध्यक्ष वृक्षलाल चौधरी बटैलै ।