कैलारी–७ के चार सामुदायिक वनमे २१ हजार रुखुवक टेल्वा लगागिल
पहुरा समाचारदाता
धनगढी, २ भदौ । कैलाली जिल्लाके कैलारी गाउँपालिका वडा नम्बर ७ स्थित चार सामुदायिक वनके २३. ८ हेक्टरमे २१ हजार रुखुवक टेलुवा लगागिल बा ।
सहास नेपाल अन्र्तगत वृक्षरोपण परियोजनाके आर्थिक सहयोगमे तारवारसहित टमान जातके २१ हजार रुखुवक टेल्वा लगागिल हो । चार ठो सामुदायिक वनमे सगुन, लिप्टिस, सिसम, बक्काइनो, निम, बरपिपल, डालेघाँस, बाँस, सखुवा, अस्ना, जाम, सिरिस, सिमल, आम, लिची, कटहर, निमुवालगायतके रुखुवक टेल्वा लगागिल सहास नेपाल अन्र्तगत वृक्षरोपण परियोजनाके परियोजना अधिकृत विप्लव चौधरी जानकारी डेलै ।
वडा नम्बर ७ मे नारायणी सामुदायिक वन उपभोक्ता समुहमे ६ हजार, मोहना सामुदायिक वन उपभोक्ता समुहमे ६ हजार, शिव सामुदायिक वन उपभोक्ता समुहमे ४५ सय, साहारा सामुदायिक वन उपभोक्ता समुहमे ४५ सय करके २१ हजार रुखुवक टेल्वा लगागिल उहाँ जनैलै । २१ हजार मन्से १२ सय भर फलफुलके टेल्वा रहल उहाँ जनैलै ।
परियोजनासे वृक्षरोपणसंगे उहीहे संरक्षणके लाग तारवार सहयोग ओ फलफूलहे पानी डहाइक लाग एक बोरिङ ओ एक ठो तल्वा बनाइक लाग सहयोग करल परियोजना अधिकृत विप्लव बटैलै ।
नारायणी सामुदायिक वन उपभोक्ता समुहके सचिव गीता चौधरी अपनेहुक्रे विगत ८÷९ बरससे वृक्षरोपण करल मने जोगाई नैसेकल बटैली । उहाँ कहली, यी बरस सहास नेपालसे आर्थिक सहयोगमे तारवारसहित वृक्षरोपण कैली । अब्बे हरियार हुइल बा । उहीहे आशा पलाइल बा । लगाइल रुखुवा बाँची कना सक्कु जानेक आश जागल बा ।
गीता कहली, सामुदायिक वनके रुखुवा नैरहल ठाउँमे प्रत्येक बरस वृक्षारोपण करी । लगाके आइल दुसर दिन गैया, भैसा, भेडी गेगरीनसे खाके नाश कैडेना करिट । अब्बे भर तारवारसहित वृक्षारोपण करलपाछे कुछ दिनमे बनुवा हरियार हुइल बा । वृक्षरोपण कैलारी गाउँपालिकाके समन्वयो हुइल रहे । कलेसे सहयोगी निकाय नवजीवन सेवा सङ्ग, सव डिभिजन वन कार्यालय बसन्त रहल रहे । वृक्षारोपणसे २ सय घरधुरी लाभान्वित हुइल बटै ।
