घाहिल ३९ कैदीबन्दी अस्पतालसे डिस्चार्ज

पहुरा समाचारदाता
धनगढी, ३ भदौ । कैलाली कारागारमे हिंसात्मक झडपमे परके घाहिल हुइल ३९ कैदीबन्दी अस्पतालसे डिस्चार्ज हुइल बटै ।

निक हुइलपाछे सेती प्रादेशिक अस्पतालसे ओइनहे डिस्चार्ज करल हो । अस्पतालसे डिस्चार्ज करल मध्ये ३४ जनहनहे कोभिड अस्पतालमे धारल प्रमुख जिल्ला अधिकारी कृष्णप्रसाद लम्साल जानकारी डेलै । उहाँक अनुसार निक हुइल पाँच जाने कैदीहे ओइनके इच्छानुसार अन्यत्र स्थानान्तरण करल बा ।

चार जनहनहे कञ्चनपुर कारागार ओ एक जनहनहे नवलपरासी कारागारमे स्थानान्तरण करल जनाइल बा । बाँकीहेफे अन्यत्र स्थानान्तरणके लाग कारागार प्रशासन ओ जिल्ला सुरक्षा समितिसे पहल करटी रहल बा । यहाँ रहल मध्ये कुछसे अन्यत्र स्थानान्तरण हुके जैना इच्छा व्यक्त करल प्रमुख जिल्ला अधिकारी लम्सालके कहाई बा । कुछ कैदीबन्दी भर कोभिड अस्पतालमे बैठे चाहल उहाँ उल्लेख करलै ।

सावन २३ गते मध्यरातमे कैलाली कारगारमे ब्लक ए ओ ब्लक बी के कैदीबिच हिंसात्मक झडप हुइल रहे । ब्लक ए के कैदीसे ब्लक बी के कैदीउप्पर आक्रमण करेबेर धनगढीके भरत चौधरीके ज्यान गैल रहे कलेसे ४७ जाने घाहिल हुइल रहिट । मृतक चौधरी लागुऔषध मुद्दामे कैद सजाय भुक्तान करटी रहल रहिट ।

घाहिल सक्कु्हुनहे सेती प्रादेशिक अस्पतालमे उपचारके लाग भर्ना करल रहे । गम्भीर अवस्थाके तीन जाने घाहिल कैदीबन्दीहे थप उपचारके लाग काठमाण्डौं लैगिल रहे । ओइनके अवस्था अब खतरामुक्त रहल प्रजिअ लम्साल जानकारी डेलै । ओस्टे, धनगढीके कोभिड अस्पतालमे तीन ओ सेती प्रादेशिक अस्पतालमे दुई जाने घाहिलहुकनके उपचार हुइटी रहल बा । अब आठ जाने घाहिल निक हुई बाँकी रहल जनाइल बा ।

कारागार घटना छानविनके लाग सहायक प्रमुख जिल्ला अधिकारी किरण जोशीके संयोकत्वमे छानबिन समिति गठन करल रहे । ओस्टेक करके, पीडित परिवारके जाहेरीके आधारमे प्रहरीसे घटनाके अनुसन्धान करटी रहल बा । छानबिन ओ अनुसन्धान जारी रहल प्रजिअ लम्साल मंगरके पत्रकार भेटघाटमे जानकारी डेलै । ओस्टेक, कैलालीके प्रमुख जिल्ला अधिकारी (सिडिओ) कृष्णप्रसाद लम्साल शान्ति सुरक्षा अमनचयनके लाग अपने कटिवद्ध रहना बटैले बटै ।

मंगरके रोज जिल्ला प्रशासन कार्यालयशमे प्रमुख जिल्ला अधिकारी लम्साल ओ यहाँके पत्रकार बिच हुइल परिचयात्मक कार्यक्रममे उहाँ ओइसीन बटाइल हुइट । उहाँ कैलाली जिल्ला सुदूरपश्चिमके राजधानी रहल ओरसे यहाँ व्यपारिक, शैक्षिक, राजनैतिक लगायत सक्कु चीजके रुपमे महत्वपूर्ण रहल ओरसे जिल्लाके शान्ति सुरक्षा अमनचयनके लाग अपने कटिवद्ध रहना बटाइल हुइट । उहाँ इहीसे आघे स्थानीय विकास अधिकारी होके आइल बेला अपने कैलालीबारे ढेर जानकार रहल बटाइल रहिट ।

उहे बिच पत्रकारहुक्रे प्रमुख जिल्ला अधिकारी समक्ष गुनासा सहित आपन सल्लाह सुझाव फेन राखल रहिट । दाङके प्रमुख जिल्ला अधिकारी रहल लम्सालहे गृहमन्त्रालयसे कैलाली सरुवा करलपाछे उहाँ कैलालीके जिम्मेवारी सम्हारल हुइट ।