बर्दगोरियामे मुक्त कमैया पुनर्स्थापना कार्यविधि बन्टी

मस्यौदा समिति गठन

पहुरा समाचारदाता
धनगढी, ३ भदौ । कैलालीके बर्दगोरिया गाउँपालिकामे रहल मुक्त कमैयाहुकनके समस्या समाधान कैना मुक्त कमैया, हलिया तथा कमलरी पुनर्स्थापना कार्यविधि बन्ना हुइल बा ।

यकर लाग मंगरके रोज गाउँपालिकासे मुक्त कमैया समाजसँग समन्वय करके छलफलसहित मस्यौदा समिति गठन करले बा । वडा नम्बर १ के वडा अध्यक्ष एवम् पालिकाके सामाजिक विकास संयोजक मिथुन गौतमके संयोजकत्वमे ५ सदस्यीय मस्यौदा समिति बनल बा । समितिमे गाउँपालिकाके कानुन अधिकृत तपेन्द्र न्यौपाने सदस्य सचिव बटै कलेसे सदस्यमे मुक्त कमैया समाजके केन्द्रीय अध्यक्ष पशुपति चौधरी, मुक्त कमैया समाजके सुदूरपश्चिम प्रदेश अध्यक्ष चन्द्रप्रसाद चौधरी ओ पूर्व कमलरी फुलकुमारी कठरिया रहल बटै ।

समितिसे सरोकारवालाहुकनसंग टमान चरणमे छलफल करके कार्यविधिके मस्यौदा तयार करी ।

तयार मस्यौदाहे समितिसे दफावार छलफलके लाग कार्यपालिकामे पठाई कलेसे छलफल पश्चात् कार्यपालिकासे कार्यविधि स्वीकृत करी । यी कार्यविधि निर्माण हुइल बर्दगोरियामे रहल मुक्त कमैयाहुकनके समस्या समाधान कैना सहज हुइना गाउँपालिकाके अध्यक्ष कर्णबहादुर कुँवरके बुझाई बा । मुक्त कमैयाहुकनके लाग आवास निर्माण, निःशुल्क शिक्षा, टमान सीपमूलक तालिम तथा सरकारी अनुदान लगायतके कार्य सञ्चालन कैना कार्यविधिसे सहजता ल्यन्ना उहाँक कहाई बा ।

“पहिल बाट टे सेवा सुविधा पैना मुक्त कमैयाके पहिचान हुई परल । उ पहिचान कहल परिचयपत्र हो । हमार पालिकामे बसोबास कैना करिब १ हजार ५ सय मुक्त कमैयाके घरपरिवार मध्ये करिब ३ सय घरपरिवारसँग अभिनफे परिचयपत्र नैहो । परिचयपत्र नैहुके सरकारसे सेवा सुविधा डेहे नैमिली । ओइने हमार डाडुभैया हुइट, कार्यविधि नैहुके मुक्त कमैया पहिचान कैनाफे समस्या हुइल । यकर लाग मुक्त कमैया समाजसंग सहकार्य करके काम आघे बह्रैले बटी ।” अध्यक्ष कुँवर कहलै ।

कार्यविधि निर्माणमे मुक्त कमैया पहिचानके सवालहे गम्भीर रूपमे उठैना बा । ढेर मुक्त कमैयाहुक्रे परिचयपत्र नैपाइल कारण सेवासे वञ्चित हुई परल ओरसे कार्यविधिमे सबसे ढेर मुक्त कमैया पहिचानके आधार तय कैना मस्यौदा समिति संयोजक मिथुन गौतम बटैलै । उहाँक अनुसार पहिचानसंगे मुक्त कमैयाके जीविकोपार्जन सवाल, सीपमूलक तालिम तथा अनुदानके सवाल, सुरक्षित आवास निर्माणके सवालफे कार्यविधिके प्राथमिकतामे परही ।

बर्दगोरियामे वडा नम्बर ३ ओ ४ मे सबसे ढेर मुक्त कमैयाहुकनके बसोबास रहल बा । कलेसे परिचयपत्र नैपैना समस्या वडा नम्बर ३ मे सबसे ढेर बा । स्थानीय सरकारसे कार्यविधि निर्माण करल पश्चात् मुक्त कमैयाके पहिचानसंगे राज्यके सेवा सुविधामेफे ओइनके पहुँच बह्रना ओ ओइनके जीवनयापन सहज हुइना अपेक्षा करल बा ।