अपराध नियन्त्रणमे समन्वय आवश्यकः मुख्यमन्त्री शाह

पहुरा समाचारदाता
धनगढी, ४ भदौ । सुदूरपश्चिम प्रदेश मुख्यमन्त्री कमलबहादुर शाह अपराध नियन्त्रणमे कोई अवरोध करे नैहुइना बटैले बटै ।

बुधके रोज जिल्ला समन्वय समितिसे धनगढीमे आयोजना करल आर्थिक बर्ष २०८१÷०८२ के वार्षिक प्रगति समिक्षा एवं स्थानीय तहके असल अभ्यास सम्बन्धी अनुभव आदन–प्रदान कार्यक्रमके समुउद्घाटन करटी उहाँ उ बाट बटाइल हुइट ।

कैलालीके प्रमुख जिल्ला अधिकारी ओ सुरक्षा निकायके प्रमुख उपस्थित कार्यक्रममे उहाँ अपराध नियन्त्रण कैना क्रममे केक्रो अनुहार नैहेर्नासमेत आग्रह करलै । “कौनो मेरके अपराध सह्यय हुइना नैहो, कौनो मेरिक गुण्डागिरी सह्यय नैहुई” मुख्यमन्त्री शाह कहलै, “अपराध ओ लागु औषध नियन्त्रणमे हम्रे सक्कु जनप्रतिनिधि सहयोग करेपरठ, हम्रे उ वातावरण निर्माण करले बटी, अभिन प्रभाबकारी बनैना जरुरी बा ।” उहाँ लागु औषध नियन्त्रणके लाग ड्रग डिलरके पहिचान कैना जनस्तरसे महत्वपूर्ण भूमिका निर्वाह करेपर्ना बटैलै ।

ढेर मेरिक सफल अभ्यास ओ सुधारके प्रयास ओ प्रयत्न करटी करटी छोट छोट अवरोध अइनास्थिति हुइलेसेफे जनताहे डेलिभरी डेना बाटमे ढुलासुस्ती करे नैहुइना मुख्यमन्त्री शाहके जोड रहे । “संविधान अनुसार निर्माण करल ऐन नियम सक्कु जाने माने परठ” मुख्यमन्त्री शाह कहलै, हम्रे केक्रो अधिकार खोस्न वा कुहीहे खुसी ओ कुहीहे दुःखी बनाई खोजल नैहुके प्रदेश निजामति ऐन ओ स्थानीय सेवा सञ्चालन सम्बन्धी ऐनहे कार्यान्वयन ओ व्यवस्थित करे खोजल हो ।”

प्रदेश सरकारसे प्रदेश निजामति ऐन ओ स्थानीय सेवा सञ्चालन सम्बन्धी जारी करल कारण कर्मचारीके वृत्ति विकास हुइल बटैटी मुख्यमन्त्री शाह ऐन निर्माणके क्रममे आइल समस्या कर्मचारी नेतृत्वसँगके संम्बादसे समाधान करल बटैलै । उहाँ ऐनमे कुछ समस्या हुइलेसे प्रदेश सरकार संशोधन कैना तयार रहल बटैलै ।

एक दुसर प्रशंगमे मुख्यमन्त्री शाहसे पालिकामे वित्तीय हस्तान्तरण ओरके बजेट अपने आइलपाछे क्रमश बह्रैटी लैगिल बटैलै । उहाँ पहिल बार अपने मुख्यमन्त्री हुके दुई प्रतिशत रहल वित्तीय हस्तान्तरण बह्राके पहिल वर्षमे आठ प्रतिशत ओ दुसरा कार्यकालमे बाह्र प्रतिशत पुगाइल बटैलै ।