पालिका स्तरीय पोषण तथा खाद्य सुरक्षा निर्देशक समिति बैठक सम्पन्न

पहुरा समाचारदाता
धनगढी, ७ भदौ । कैलारी गाउँपालिकाके हसुलियामे पालिका स्तरीय पोषण तथा खाद्य सुरक्षा निर्देशक समितिके बैठक ओ पोषण परियोजनाके दुसरा वर्षके परिचयात्मक कार्यक्रम शुकके रोज सम्पन्न हुइल बा ।

केयर नेपाल ओ आइडिई के आर्थिक सहयोगमे डाई ओ लर्कनके पोषण सुधार ल्यन्ना लक्ष्यके साथ सञ्चालित याक नेपालके समन्वय ओ सहकार्यमे कैलारी गाउँपालिका स्तरीय पोषण तथा खाद्य सुरक्षा निर्देशक समितिके अध्यक्ष राजसमझ चौधरीके अध्यक्षतामे निर्देशक समितिके बैठक हुइल हो । कार्यक्रममे सम्बोधन करटी उहाँ गाउँपालिका याक नेपालसे सहकार्य करके पोषण सम्बन्धी टमान कार्य करटी आइल बटैलै । उहाँ कहलै, ‘गाउँपालिकासे हाली कुछ वडामे पोषणमैत्री वडा घोषणा कैना तयारीके लाग आघे बह्रल बा । यकर एक जानेक प्रयाससे नैहुके सक्कु जाने समन्वय ओ सहकार्य जरुरी बा ।’

पहिलेक तुलनामे पोषणके अवस्थामे सुधार हुइटी गैल कहटी डाई ओ लर्कनके अवस्था सुधारके लाग पालिकाके सक्कु शाखा समन्वय करके जैना उहाँ बटैलै ।

ओस्टेक करके पोषणके क्षेत्रसे गाउँपालिकाके स्वास्थ्य शाखा, शिक्षा शाखा, कृषि शाखा, महिला तथा बालबालिका शाखा, पशु शाखा, खानेपानी शाखा, उद्यम विकास शाखासे चालु बर्षके योजना प्रस्तुत करल रहिट । ओस्टेक करके प्रमुख प्रशासकीय अधिकृतके ओरसे स्वास्थ्य शाखाके अनिता चौधरी प्रस्तुतीकरण राखल रहिट ।

कार्यक्रममे सहजीकरण प्रस्तुतीकरण याक नेपालके कार्यक्रम संयोजक जगत प्रसाद उपाध्याय ओ आइडीई नेपालके कार्यक्रम अधिकृत दामोदर भट्ट करल रहिट । ओस्टेक पोषणके लेखाजोखा कैलारी गाउँपालिका वडा नम्बर ४ स्वास्थ्य चौकीके इन्चार्ज रमेश रोकाय राखल रहिट ।

याक नेपालके लैङिक समानता सामाजिक समावेशीकरण अधिकृत सरिता चौधरी पोषण परियोजना कैलारी गाउँपालिका वडा नम्बर ४ ओ ७ के २५ ठो आमा समुह पोषण सुधारके लाग पोषण बगैचा सुरुवाट करल बटैली । हजार दिनके लरकोरया डाई ओ बच्चाके पोषण सुधारके लाग पोषणके गतिविधि करजैटी बा, उहाँ कहली, ‘सीमान्तकृत समुदायके लाग विउ पुँजीके रुपमे १० हजार रुप्या सहितके किसान कार्ड उपलब्ध करागैल बा । जिहीहे उ समुहमे रहल लरकोरया डाई सागपात, हरियार टिना टावन उत्पादनके लाग विया किन्ना, पोषण बगैचा निर्माण कैना ओ टिना उत्पादन अन्र्तगत कृषि कार्यमे प्रयोग हुइना समान किन्ठै ।

याक नेपालसे आमा समु्हमे आवद्ध रहल ५ सय जनहनहे किसान कार्ड उपलब्ध करैले बा, जौन कार्डमे टिनाके विया, हजारी, पानी डरना पाइप, जाली, उत्पादन पोषण बगैचाके लाग सपोट करल उहाँ बटैली ।
पोषण बगैचामे दुई तिन मेरिक साग, वेमौसमी टिना उत्पादन कैगिल बा । कलेसे महिलाहुकनके बच्चनके लाग झोल लिटो पकैना तरिकाफे सिखागैल बा । पोषण परियोजना लागु हुइलपाछे पोषणयूक्त खानाके साथे स्वास्थ्य संस्थामे समय समयमे चेकजाँच करैटी रहलपाछे कुपोषणके जटिल खाले केस सामान्य अवस्थामे ल्यन्ना मद्दत मिलल उहाँ बटैली ।

पहिलेक तुल्ना महिलाहुक्रे आपन बच्चनके कुपोषणसे बचाइक लाग सचेत हुइनाके साथे चासो लेहल बटैली । याक नेपालसे उहाँहुकनहे तालिम, सामाजिक विश्लेषणके आधारमे चेतना प्रदान कैगिल उहाँ बटैली ।

ओस्टेक महिलाहुकनके क्षमता अभिबृद्धि, पोषण सुधारके लाग हजार दिनके डाईहुकनके आपन घर भिटर हुइना निर्णयमे पहुँच पुगे कना उद्देश्य सचेतीकरण करल, घरेक स्रोत साधानमे पहँुच पुगे कहिके छलफल चलैटी आइल उहाँ बटैली ।
याक नेपाल स्वास्थ्य संस्था संचालनमे प्रभावकारी बनैना ओरफे काम करटी रहल बा, उहाँ कहली ‘समुदायसे लेके सरकारके संरचनागत सुधारमे सपोट हुइना मेरिक काम करटी । ओम्ने स्वास्थ्य संस्थाहे इकुपमेन्ट सपोट, स्वास्थ्यकर्मीनके क्षमता अभिवृद्धिके काम, समुदायस्तरमे सचेतनामूलक काम परियोजना अन्र्तगत कैगिल बा ।

कार्यक्रममे गाउँपालिका उपाध्यक्ष भगवतीकुमारी चौधरी,निमित्त प्रमुख प्रशासकीय अधिकृत सुर्य प्रसाद चौधरी, वडा अध्यक्षहुक्रे, गाउँपालिकाके विषयगत शाखाके प्रमुखहुकनके सहभागिता रहल रहे । कार्यक्रमके संचालन सामाजिक विकास शाखा प्रमुख यगम कलेल करल रहिट ।