धनगढी उपमहानगरपालिका ल्यानल फोम दमकल
पहुरा समाचारदाता
धनगढी, ११ भदौ । धनगढी उप महानगरपालिकासे फोम दमकल सेवा सुचारु करले बा । भारी आगलागी हुइलेसे नियन्त्रण कैना हम्मे हम्मे पर्ना समस्याहे मध्यनजर करटी फोम दमकलसे प्लास्टिक तथा अन्य ढेर ज्वलन्सिल वस्तुमे लागल आगीहेफे सहजे बुटाई सेक्ना जनाइल बा ।
बुधके रोज एक विशेष समारोहके बीच नगर प्रमुख गोपाल हमाल फोम दममल सेवा सुचारु हुइल घोषणा करलै । ‘फोम दमकलसे जोरसे आगलागीमेफे सामान्य दमकलसे विशेष काम करी,’ नगर प्रमुख हमाल कहलै, ‘उ आब आगालागी हुइलेसे नियन्त्रणमे सहजता हुइना अपेक्षा करल बा ।’
पाँच हजार लिटर पानी अटैना क्षमतासहितके उ दमकलमे आगी नियन्त्रणके लाग आवश्यक रसायन रख्न सुविधाफे रहल बा । उपमहानगरके अनुसार इन्धन डिपो, प्लास्टिकजन्य पदार्थ, टरपेन्टाइनलगायत सामान्य पानीसे बुटाई नैसेक्ना आगलागी नियन्त्रणमे यी दमकलसे प्रभावकारी काम करी ।
नगर प्रमुख हमालके अनुसार उपमहानगरपालिकासे हालसम आठ ठाउँमे फायर हाइड्रेन्ट स्थापना करसेकल बा, जिहीसे दमकलमे पानी भर्ना सहज बनाई । उहाँ ‘हरघडी नगर प्रहरी’ कना नाराहे व्यवहारिक बनैना उपमहानगरसे करल लगानी ओ तयारी सुदूरपश्चिममे अब्बल रहल उल्लेख करटी आगलागीके खबर प्राप्त हुइल तीन मिनेटभिटरे दमकल परिचालन कैना व्यवस्था मिलाइल जानकारी डेलै ।
धनगढी उपमहानगरपालिकासे नयाँ प्रविधियुक्त दमकल खरिदमे ६६ लाख ३५ हजार ३ सय ५० रुप्या खर्च हुइल जनैले बा । दमकलमे ५ हजार लिटर पानी ओ ५ सय लिटर केमिकल भर्ना क्षमता रहल उपमहानगर जनैले बा । दमकल उदघाटन कार्यक्रममे मेयर हमालसे नगरवासीहे बिना कारण दमकल सेवामे फोन नैकर्ना आग्रह करटी आगलागी हुईबेर भर तुरुन्ते उपमहानगरके दमकल सेवामे जानकारी डेना अनुरोध करलै ।
