एसपीए कलेज प्रमुखमे सह-प्राध्यापक चौधरी नियुक्त
पहुरा समाचारदाता
धनगढी, १७ भदौ । क्रिकेटके सहर धनगढीस्थित सुदूरपश्चिमाञ्चल क्याम्पस (एसपीए कलेज) के क्याम्पस प्रमुखमे सह–प्राध्यापक बुधराम चौधरी नियुक्त हुइल बटै । मंगरके क्याम्पसके अडिटोरियम हलमे आयोजित कार्यक्रममे उहाँहे क्याम्पस प्रमुखके जिम्मेवारी प्रदान करल हो ।
त्रिभुवन विश्वविद्यालयसे एमबिए अध्ययन पूरा करल चौधरी वि.सं २०५६ सालमे एसपीए कलेज स्थापना हुइलपाछे लेखा शास्त्र अध्यापन सुरु करल रहिट । इ बिचमे उहाँ ईसीए कोर्डिनेटर, सहायक क्याम्पस प्रमुखसहित टमान जिम्मेवारी सम्हारसेकल बटै । साथे उहाँ कक्षा ११, १२ ओ बीबीएस प्रथम तथा द्वितीय बरसके लाग देशभर प्रयोग हुइना लेखा शास्त्रके पाठ्यपुस्तकमे सह–लेखकके भूमिका फेन निर्वाह करले बटै ।
लगातार २७ बरससे अक्के संस्थामे सेवा डेटी आइल चौधरीहे सुदूरपश्चिममे लेखा शास्त्र अध्यापनमे अब्बल प्राध्यापकके रूपमे चिन्हजाइठ् । उहाँके लम्मा समयके योगदानहे कदर कैटी एसपीए कलेज सञ्चालक समितिसे क्याम्पस प्रमुखमे नियुक्ति करल जनैले बा ।
कार्यक्रममे बधाई डेटी एसपीए कलेजके प्रबन्ध निर्देशक सुवास शाही सह–प्राध्यापक बुधराम चौधरी आदर्श ओ प्रेरणादायी व्यक्तित्व रहल बटैलै । उहाँ, सही ठाउँ, सही समयमे सही व्यक्तिके छनोट हुइलमे खुसी व्यक्त कैनाके साथे चौधरीके नेतृत्वमे आब क्याम्पस लावा उचाइ लेना विश्वास प्रकट करलै ।
ओस्टके, नव–नियुक्त प्रमुख चौधरी क्याम्पस स्थापनाकालसे नै कार्यरत संस्थामे प्रमुखके जिम्मेवारी सम्हर्ना अवसर पैना गौरवके विषय रहल बटैलै । यकर साथे उहाँ आघेक क्याम्पस प्रमुखहुक्रनसे करल सकारात्मक पक्षहे निरन्तरता डेना बटैलै । साथे इमानदारी ओ लगनशीलताहे आधार बनाके सक्कु टिमसँग सहकार्य कैटी क्याम्पसके समग्र उन्नयनमे लग्ना प्रतिबद्धता व्यक्त करले बटै ।
