नवज्योति कृषि सहकारीसे हिउँदे तरकारी खेती सम्बन्धी तालिम

पहुरा समाचारदाता
धनगढी, २० भदौ । कैलालीके धनगढी उपमहानगरपालिका वडा नम्बर ७ मे रहल नवज्योति कृषि सहकारी संस्था लिमिटेडके आयोजनामे ओ कृषि ज्ञान केन्द्र कैलालीके सहजीकरणमे हिउँदे तरकारी खेती सम्बन्धी एक दिने कृषक तालिम सम्पन्न हुइल बा ।

शिक्षा समिती संयोजक अनिता चौधरीके सभाध्यक्षतामे हुइल तालिमके प्रशिक्षक सहायक कृषि प्रसार अधिकृत राम नारायण चौधरी तरकारी खेतीसम्बन्धी जानकारी कराइल रहिट ।

कृषि ज्ञान केन्द्रके निमित्त कार्यालय प्रमुख टेक बहादुर विष्ट हिउदे तरकारी बीउ–बिजन ओ नर्सरी व्यवस्थापनबारे प्रशिक्षण डेहल रहिट ।

कार्यक्रममे ४० जानेसे ढेर शेयर सदस्य तथा सञ्चालक समितिके सदस्यहुकनके उपस्थिति रहल रहे । सहभागीहे ८ समूहमे विभाजन करके टिमाटर, बन्दागोभी, फूलगोभी ओ मिर्चाके बीया वितरण करल व्यवस्थापक उग्रसेन राना जानकारी डेहल हुइट ।