मुक्त कमलरीसे निर्मित हस्तकला प्रवद्र्धनके लाग प्रदर्शनी मेला आयोजना
पहुरा समाचारदाता
धनगढी, २२ भदौ । मुक्त कमलरी महिला तथा आदिवासी महिलाहुकनसे तयार पारल हस्तकला प्रवद्र्धनके लाग धनगढीमे तीन दिने प्रदर्शनी मेला आयोजना हुइना बा ।
फिमि इन्टरनेशनलके आर्थिक सहयोगमे मुक्त कमलरी विकास मञ्चके आयोजनामे कैलालीके धनगढी उपमहानगरपालिका–वडा नम्बर १ स्थित नैनादेवी मन्दिर लग्गे रहल बसेरा होटलमे मेलाके आयोजना हुई जैटी रहल बा ।
मञ्चके केन्द्रीय अध्यक्ष हिरा चौधरीके अनुसार यिहे भदौ २४, २५ ओ २६ गते टमान स्टल धारके मुक्त कमलरी महिला तथा आदिवासी महिलाहुकनसे तयार पारल हस्तकलाके प्रदर्शनी कैना बटैली ।
प्रदर्शनीमे मुक्त कमलरी महिला तथा आदिवासी महिलाहुकनसे तयार पारल हस्तकला ढकीय, डोक्नी हेल्का, डिलिया, गोन्द्री, बेना, ढकियाके सामान पान बास्केट डबल बिनल, डालो, फुलदानी डबल बिनल, चटाई, टिम्याट, डबल बिनल राउण्ड बास्केट, सिङगल बिनल राउण्ड बास्केट, पेनदानी, हटकेस हयान्डल, पानस कलश, डबल बिनल हटकेश, जोइलरी बाकस डबलमे, अण्डाकार बास्केट डोरीमे डबल, अण्डाकार बास्केट डोरीमे सिंगल, सुपारी ढरना, डस्टबिन, टोपी, कलस चटाईमे डबल, कलस चटाईमे सिङगल, खुटक्रे, ट्रेय, रंङगीन फुलदानी प्रदर्शनी तथा विक्रीके लाग धरना उहाँ बटैली । ओस्टेक करके बेतबाँससे निर्माण हुइना टमान मेरिक सामानफे प्रदर्शनीके लाग धरना उहाँ जनैली ।
उहाँ कहली, ‘मुक्त कमलरी महिला तथा आदिवासी महिलाहुकनसे आर्कषक हस्तकला निर्माण करटी रहल बटै । ओइनके बनाइल हस्तकलाके प्रचारप्रसार ओ प्रवद्र्धन हुई नैसेकल कारण बजारीकरणमे सहजता होए कहिके प्रदर्शनी मेलाके आयोजना करल हो ।
फिमि इन्टरनेशनलके आर्थिक सहयोगमे मुक्त कमलरी विकास मञ्चके आयोजनामे कैलालीके कैलारी गाउँपालिका, टीकापुर नगरपालिका ओ कञ्चनपुरके भीमदत्त नगरपालिका ओ बेदकोट नगरपालिकाके मुक्त कमलरी महिला तथा आदिवासी महिलाहुकनहे हस्तकलाके तालिम प्रदान कैगिल रहे ।
सरकार कमलरीहुकनहे २०७० साल १३ गते मुक्ती घोषणा करल रहे । मुक्ती घोषणा करलपाछे मुक्त कलमरी विकास मञ्चसे कैलालीमे ४०७४, कञ्चनपुरमे ११६७, बर्दियामे ३२०३, बाँके ६६७, दाङमे ३६५८ करके १२ हजार ७ सय ६९ जानेक तथ्यांक संकलन करले । कलेसे नेपाल सरकारके तथ्यांकमे ९ हजार ४ सय ९० मुक्त कमलरीके तथ्यांक संकलन करके जम्मा ७ हजार ४ सय ३५ जनहनमे परिचयपत्र वितरण करल रहे कलेसे अभिन २ हजार ५५ जाने परिचय पत्र पैनासे बञ्चित बटै ।
मुक्त कलमरी विकास मञ्चसे तथ्यांक अनुसार ५ हजार ३३४ परिचयपत्र पैनासे बञ्चित रहल केन्द्रीय अध्यक्ष हिरा चौधरी जनैली ।
सरकार २०७० जेठ २४ गते मुक्त कमलरीहुकनहे परिचयपत्रके व्यवस्था कैना, शिक्षा, स्वास्थ्य तथा मुक्त कमलरीके पुनस्र्थापनाके कार्यक्रम नन्ना लगायतके १० बुँदे सम्झौता करल रहे ।
मुक्तिपाछेफे ढेर मुक्त कमलरीके अवस्था दयनीय रहल ओरसे मञ्च हाली सहमति कार्यान्वयनके लाग माग करटी आइल बा ।
ढेर जैसिन मुक्तकमलरीहुक्रे परिचयपत्र नइपाइल कारण शिक्षा, स्वास्थ्य, रोजगारसे बन्चित हुइटी बटै, अध्यक्ष चौधरी कहली, छुट मुक्त कमलरीहे नेपाल सरकारके ओरसे तत्काल आधिकारिक परिचयपत्र वितरण करे पर्ना, छात्रवृत्ति रकम वृद्धि करे पर्ना, मुक्त कमलरीके लाग छोट ओ नम्मा अवधिके व्यवसायिक तालिमके व्यवस्था करे पर्ना ओ सरकारसंग हुइल १० बुँदे सम्झौताके सक्कु बुँदाके तत्काल कार्यान्वयन करे पर्ना माग करल मने सुनुवाई हुइल नैहो ।
