गौरीफन्टा नाकासे नेपालीहे भारत प्रवेश निषेध
पहुरा समाचारदाता
धनगढी, २५ भदौ । सुदूरपश्चिके प्रमुख नाका गौरीफन्टा नाकासे भारत प्रवेशमे रोक लगाइल बा ।
भारतसँगके गौरीफन्टा नाकासे नेपाली नागरिकहे भारत प्रवेशमे रोक लगाइल हो । गड्डाचौकी ओ गौरीफन्टा नाकासे भारत प्रवेश करे खोजल नेपालीहे भारतीय सशस्त्र सीमा बल (एसएसबी) से घुमाइल पीडितहुक्रे गुनासो करले बटै ।
नेपालके पाछेक स्थितिहे मध्यनजर कैटी भारतसे नेपाली नाकामे कडाई करल बा । नेपालसँग जोरल नाकासे आधारकार्ड बिना प्रवेशमे रोक लगाइल हो । कैलालीके गौरीफन्टा नाकासे समेत भारत प्रवेशमे रोक लगाइल हो ।
भारतओरसे प्राप्त आदेशके आधारमे रोक लगाइल ओ नेपालके टमान कारागारसे कैदीबन्दी भागलपाछे उहाँहुक्रे सीमा हुइटी भारत पैँठे सेक्ना आशंकासे सुरक्षा कडाइ करल बटाइल बा । जेकर कारण टमान कामसे भारत प्रवेश करुइया नेपालीहे नाकामे रोकल बावै । भारतमे बसोबास करटी रहल नेपाली गन्तव्य ओर जाइ नैपाइलपाछे समस्यामा परल बटै । यकर साथे पितृ कार्यके लाग भारतके तिर्थ स्थल ओर जउइया नेपाली फेन नाकामे रोकल हुइट ।
नेपालीहे प्रवेशमे रोक लगैनाके साथे भारतसे नेपाल प्रवेश करुइयाहे समेत कडा चेकजाँच करे लागल बा । नेपालके पाछेक परिस्थितीहे मध्यनजर कैटी नेपाल अउइयनउपर कडा चेकजाँच करल स्वदेश घुमल नेपालीके गुनासो रहल बा ।
ओस्टके कैलालीमे सेना परिचालन करल बा । बुधके सकारेसे नेपाली सेना, नेपाल प्रहरी ओ सशस्त्र प्रहरी संयुक्त रूपमे बजार तथा आसपासके क्षेत्रमे गस्ती बह्राइल बावै । अत्यावश्यक काम बाहेक सर्वसाधारणहे घरबाहर नैनिक्रना आग्रह करल बा ।
