कञ्चनपुर कारागारसे भागल मन्से २१ कैदीबन्दी फिर्ता
पहुरा समाचारदाता
कञ्चनपुर, २५ भदौ । कञ्चनपुर कारागारसे मंगर रात फरार हुइल मन्से २१ जाने कैदीबन्दी फिर्ता हुइल बटै ।
कारागार कार्यालय कञ्चनपुरके निमित्त प्रशासक रामदत्त जोशीके अनुसार कारागारमे कुल ४७९ कैदीबन्दी रहिट । मंगर रात करिब तीन–चार सयके सख्यामे घरेलु हतियारसहित आइल व्यक्ति कारागार प्रवेश करके मूलगेटके ताला तुरके कैदीबन्दीेहे भग्ना सहयोग करल रहिट ।
“भागल मन्से २१ जाने कारागार लौटल बटै,” प्रशासक जोशी कहलै, “कुछ कैदीबन्दी सम्पर्कमे बटै ओ लौटना बटैले बटै मने कफ्र्यू आदेश जारी हुइल ओरसे लौटे नैसेकल जानकारी डेले बटै ।” उहाँक अनुसार हालसम सम्पर्कमे नैआइल कैदीबन्दीहुनके खोजतलासके लाग प्रहरी परिचालन करल बा । कारागारो ४५३ पुरुष ओ २६ महिला करके कुल ४७९ कैदीबन्दी रहिट । जेम्ने सबसे ढेर १६९ जाने लागुऔषध सम्बन्धी मुद्दाके रहिट ।
यिहे बीच, जिल्ला प्रशासन कार्यालय कञ्चनपुरसे सार्वजनिक सूचना जारी करटी फरार कैदीबन्दीनहे हाली कारागार कार्यालय वा लग्गेक सुरक्षा निकायमे सम्पर्कमे अइना आग्रह करले बा । “सम्पर्कमे नैअइना कैदीबन्दीउप्पर कानुनअनुसार कडा कारबाही हुइना बा,” सूचनामे उल्लेख बा ।
