कैलालीमे आजफेन कर्फ्यु जारी

पहुरा समाचारदाता
धनगढी, २६ भदौ । जिल्ला प्रशासन कार्यालय कैलालीसे मंगरके रोजसे आदेश जारी करल कर्फ्यु बिफेक रोज फेन जारी रहल बा ।

जिल्ला प्रशासन कार्यालय कैलालीके सूचना अधिकारी शिवराज जोशीके अनुसार स्थानीय प्रशासन ऐन, २०२८ के दफा ६ (क) बमोजिम २४ गते (मंगर) के सूचना अनुसार औरे सूचना नैआइटसमके लाग जिल्ला भर कर्फ्यु आदेश जारी रहल बा ।

अधिकारी जोशी शान्ति, सुरक्षा कायम कैना ओ सम्भावित अप्रिय गतिविधि नियन्त्रण कैना कर्फ्यु आदेश जारी करल ओ यी बारे छलफलके लाग प्रमुख जिल्ला अधिकारी सँग समन्वय हुइटी रहल बटैले बटै ।

इहे बिच कैलालीके धनगढीसँग सीमाना जोरल गौरीफन्टा सीमा नाकामे फेन आवतजावत बन्द रहल सूचना अधिकारी जोशी जानकारी डेलै । नेपालमे सोम्मारके ओ मंगरके हुइल जेन–जी समूहके आन्दोलनके कारण सरकार विहीन रहल अवस्थामे भारतीय सुरक्षाकर्मीहुक्रे नेपालीनहे भारत प्रवेशमे रोक लगैले बटै ।