चैतन्य कहल– जेनजी आन्दोलनमे उग्र बनल शाह हमार अब्बेक कर्मचारी नैहो

पहुरा समाचारदाता
धनगढी, २८ भदौ । कैलालीके धनगढी–५ शिवनगरमे अवस्थित चैतन्य पाठशालासे अपन प्रतिष्ठाउप्पर लक्षित हुके अब्बे हुइटी रहल टमान टिप्पणीप्रति ध्यानाकर्षण हुइल जनैले बा ।

विद्यालयसे शुकके एक प्रेस विज्ञप्ती जारी करटी पूर्व कर्मचारी भरत विक्रम शाहके जेनजी आन्दोलनमे व्यक्तिगत संलग्नता हुइल कारण सामाजिक सञ्जालमार्फत संस्थाबारे भ्रमपूर्ण ओ अप्रामाणिक प्रचार करल कहटी आपत्ति जनाइल हो ।

विज्ञप्तीमे कहल बा, “चैतन्य पाठशाला शुद्ध शिक्षा ओ संस्कारके मन्दिर हो । संस्थाउप्पर हुइल यैसिन निराधार टिप्पणीसे संस्थाके छवि, सरोकारवाला ओ शुभेच्छुक व्यक्तिहुकनमे नकारात्मक प्रभाव पर्ना प्रयास हुइल बा” विद्यालय प्रशासनसे यैसिन गतिविधिसे प्रभावित नैहुइना आग्रह करटी पूर्व कर्मचारी शाह संग सम्बन्धित विषय विद्यालयसँग कौनो सरोकार नैरहल स्पष्ट परले बा ।

विद्यालयसे शिक्षा ओ संस्कारके निरन्तर उन्नतिके लाग अपने सदा समर्पित रहल उल्लेख करटी विद्यार्थी, अभिभावक ओ सरोकारवालाहे सकारात्मक सहयोग ओ मार्गनिर्देशनके लाग आग्रह करले बा ।