गाउँपालिका अध्यक्ष राजसमझसे राजीनामा फिर्ता

पहुरा समाचारदाता
धनगढी, २९ भदौ । कैलाली जिल्लाके कैलारी गाउँपालिका अध्यक्ष राजसमझ चौधरी सामाजिक संजालमार्फत डेहल राजीनामा फिर्ता लेहल घोषणा करले बटै ।

यिहे भदौ २३ ओ २४ गते हुइल जेएनजीके आन्दोलनमे हुकान निजि घरमे ओ गाउँपालिकामे तोडफोड आगजानी करके ज्यान मर्ना धम्की आइलपाछे बाध्य हुके राजीनामा डेहल उहाँ जनैले बटै ।

राजीनामा नैडेलेसे ज्यान मर्ना धम्की आइलपाछे बाध्य हुके गैल भदौ २४ गते उहाँ गाउँपालिका अध्यक्ष र पार्टीके कौनो पदमे नैरना कहिके सामाजिक संजाल मार्फत राजीनामा डेहल रहिट ।

गाउँपालिकाके सार्वजनिक सम्पति तथा नीजि सम्पतिके संरक्षणके लाग कैलारीबासी, गाउँसभा सदस्य, राजनीतिक दलसे राजीनामा फिर्ता लेना आग्रह करलपाछे उहाँ शनिच्चरके रोज उ राजीनामा फिर्ता लेहल जानकारी करैले बटै । ओस्टेक करके गाउँपालिकाके नियमित काम कार्वाही आघे बह्रैना कैलारीबासीमे सहयोग ओ समन्वय कैना हार्दिक अनुरोध करले बटै ।

ओस्टेक करके कैलारी गाउँपालिका वडा नम्बर ३ के वडाध्यक्ष सन्तराम चौधरीफे सामाजिक संजालमार्फत डेहल राजीनामा फिर्ता लेहल घोषणा करले बटै ।

भदौ २४ गते जिएनजी आन्दोलनकारीके नाउँमे सार्वजनिक सम्पति गाउँपालिकाके कार्यालयके मुख्यमुख्य शाखाके महत्वपूर्ण कागजात, सरसमान, सक्कु वडा कार्यालयके सक्कु सामान तोडफोड ओ आगजानी करल बा । पालिकाके महत्वपूर्ण कागजात निकारके आगजानी करलपाछे सेवा प्रवाहमे समस्य अइना डेखल बा ।

ओस्टेक गाउँपालिका अध्यक्ष राजसमझ चौधरी, उपाध्यक्ष भगवतीकुमारी चौधरीके नीजि घरके सरसामान तोडफोड ओ आगजानी करल बा । प्रदर्शनकारीहुक्रे पालिकामे धारल एक ठो स्कुटी ओ दुई ठो मोटरसाइकलफे जरैले बटै ।