कैलारी गाउँपालिकासे सहयोग तथा समन्वयके लाग अपिल

पहुरा समाचारदाता
धनगढी, ३० भदौ । गैल भदौ २४ गतेके दिन जेन जी आन्दोलनके क्रममे कैलारी गाउँपालिकाके प्रशासकीय भवनमे आगजनी तथा वडा कार्यालय जरके ध्वस्त हुइलपाछे गाउँपालिकासे सहयोग तथा समन्वयके लाग अपिल करले बा ।

भवनमे हुइल भौतिक क्षतिके कारण दैनिक प्रशासनिक कामकाज तथा सेवा प्रवाहमे असहजता उत्पन्न हुइल ओरसे कैलारी गाउँपालिका बासी नागरिकहुकनहे सहज रुपमे सेवा प्रवाह करेक लाग स्वच्छिक रुपमे सहयोगके कैडैना गाउँपालिका उपाध्यक्ष राजसमझ चौधरी आग्रह करले बटै ।

उहाँ उद्योगी, व्यापारी, सहकारी, गैर सरकारी संस्था, औद्योगिक प्रतिष्ठान, ईच्छुक व्यक्तिहुकनहे स्वच्छिक रुपमे सहयोग (कम्प्युटर, ल्यापटप, प्रिन्टर, फर्निचर, सूचना प्रविधि उपकरण तथा अन्य मसलन्द) सहयोगके लाग अपिल करल हुइट ।
साथे यी गाउँपालिकाके कार्यालय तथा वडा कार्यालयके सरसामान कौनो व्यक्ति लैगिल हुइलेसे गाउँपालिकामे बुझाई डेनासमेत अनुरोध कैगिल बा ।

वर्तमान परिस्थितिके कारणसे गाउँपालिका तथा वडा कार्यालयसे सुलभ तथा सहज रुपमे सेवा प्रवाह सहज रुपमे उपलब्ध कराई नैसेकलमे कैलारी गाउँपालिका परिवार क्षमाप्रार्थी हुइल अध्यक्ष कहले बटै ।