कैलारीमे वडा कार्यालयके सेवा पालिकासे संचालन

पहुरा समाचारदाता
धनगढी,१ कुवाँर । गैल भदौ २४ गते जेनजी आन्दोलनके नाउँमे कैलाली जिल्लाके कैलारी गाउँपालिका अन्र्तगत रहल सक्कु वडा कार्यालय जराके ध्वस्त बनाइलपाछे वहाँसे प्रदान कैना सेवा पालिकासे डेना सुरुवाट करल बा ।

आन्दोलनकारीहुक्रे गाउँपालिकाके कार्यालयमे रहल मुख्य मुख्य शाखाके अति महत्वपूर्ण सर–समान निकारके जराइल रहिट । ओकरसंगे एकसे नौ नम्बर वडा कार्यालयमे तोडफोड ओ आगजानी करके भवन ध्वस्त बनाइलपाछे सेवा प्रभावित हुइल गाउँपालिका अध्यक्ष राजसमझ चौधरी जनैलै ।

उहाँ कहलै, एक ओ दुई नम्बर वडा कार्यालयमे रहल सक्कु समान जराइल बा । कलेसे बाँकी रहल वडा कार्यालय भिटर तोडफोड ओ आगजानी करलपाछे भवन ध्वस्त हुइल बा । वहाँ रहल सक्कु समान जरके भुवा बनल बा ।

वडा कार्यालय ध्वस्त हुके उ ठाउँसे काम गाह्रो हुइलपाछे अब्बे सक्कु वडासे प्रदान कैना सेवा पालिकासे सुरुवाट करल अध्यक्ष बटैलै ।

पालिकासे दुर पर्ना वडामे जेष्ठ, अपाङता रहल नागरिकहुकनहे वडा कार्यालयसे सामाजिक सुरुक्षा भत्ता वितरण करल रही । अब्बे सबसे ढेर समस्या जेष्ठ, अपाङता रहल नागरिकहुकनहे पर्ना उहाँ बटैलै ।

पालिकामे रहल मुख्य–मुख्य शाखाके सरसमानमे तोडफोड ओ आगजानी करलपाछे सेवा विस्तारमे समस्या आइल ओ व्यवस्थापन ओर लागल गाउँपालिका अध्यक्ष बटैलै ।

आन्दोलनकारीहुक्रे पालिकामे धारल दुई ठो मोटरसाइकल, एक ठो स्कुटी, गाउँपालिका अध्यक्ष ओ उपाध्यक्षके निजि घरके सरसमानमे तोडफोड ओ आगजानी करल रहिट । सार्वजनिक सम्पतिमे आगजानी करके ध्वस्त बनाइल पालिकाहे पुराने अवस्थामे लौटाइक लाग सक्कु जानेक सहयोग ओ समन्वय आवश्यक रहल उहाँ बटैलै ।

उहाँ जेनजी पुस्तासे भदौ २३ गतेसे जायज माग राखके आन्दोलन सुरुवाट करल कहटी आन्दोलनप्रति पूर्ण समर्थन रहल जनैलै । मुलुकमे परिवर्तनके क्रममे सहादत प्राप्त करुइया सक्कु जेनजी यूवाप्रति हार्दिक श्रद्धाञ्जली व्यक्तफे करले बटै ।