धनगढीमे सुपथ मूल्य पसल सञ्चालन

पहुरा समाचारदाता
धनगढी, १ कुँवार । खाद्य व्यवस्था तथा व्यापार कम्पनी लिमिटेड प्रादेशिक कार्यालय धनगढी सुपथ मूल्य पसल सञ्चालनमे लन्ले बा ।

आमउपभोक्ताहे सहुलियत दरमे उपभोग्य वस्तु उपलब्ध करैना उद्देश्यसे टरटिहुवार लक्षित सुपथ मुल्य पसल सञ्चालनमे लानल हो । धनगढीमे सोम्मारके एक कार्यक्रमके बीच खाद्य व्यवस्था तथा व्यापार कम्पनी लिमिटेड सुदूरपश्चिम प्रादेशिक कार्यालय धनगढीके प्रमुख दीपक थापा पसलके उद्घाटन करल रहिट ।

डसैँ, डेवारी, छठलगायत टमन टरटिहवारमे उपभोक्ताहे सहज ओ सहुलियत दरमे उपलब्ध करैना कम्पनीसे धनगढी मेनबजार स्थित बिक्री कक्ष, मोहनपुर गोदाम ओ प्रदेशके २८ स्थानमे सहुलियत पसल सञ्चालनमे लानल बा ।

सहुलियत पसलमे उपभोक्ता टमान मेरके नाउर प्रतिकेजी रु पाँच रुपिया छुट पैना बटै । उपभोक्ता अरुवा मोटा चाउर प्रति केजी ६२ रुपिया पर्नामे सहुलियत पसलमे छुट पाछे प्रतिकेजी ५७ रुपिया ओ २५ केजीके बोरा रु. एक हजार ४२५ मे किने पैना बटै ।

प्रतिकिलो रु. ८८ रहल स्टिम जिरा मसिन चाउर छुट पाछे प्रतिकिलो रु. ८३ रुपियामे ओ २५ केजीके बोरा रु. २ हजार ७५ रुपियामे किने पैना कम्पनी जनैले बावै । सागथे प्रति किलो रु. १०० रुपिया पर्ना चिनी ५ रुपिया छुट पाछे प्रति किलो रु. ९५ रुपिया पर्ना कम्पनी जनैले बावै ।

नेपालीके प्रमुख टरटिहुवार डसैँ, डेवारी ओ छठके समयमे खाद्य वस्तुके माग अत्यधिक हुइना ओ उ समयमे गुणस्तरीय वस्तु उचित मूल्यमे उपलब्ध करैना वातावण तयार कैना उद्देश्यसे कम्पनीसे हरेक बरस टरटिहुवार लक्षित सहुलियत पसल सञ्चालनमे लन्ना करठ् ।

खाद्य व्यवस्था तथा व्यापार कम्पनी लिमिटेडसे डसैँ, डेवारी ओ छठहे लक्षित कैटी सुदूरपश्चिमके २८ स्थानमे सुपथ मूल्य पसल सञ्चालन करले बा कलेसे साल्ट ट्रेडिङसे प्रदेशके आठ स्थानमे सुपथ मूल्य पसल सञ्चालन करले बा ।

खाद्य व्यवस्था तथा व्यापार कम्पनी लिमिटेड सुदूरपश्चिम प्रदेश कार्यालयके प्रादेशिक प्रमुख थापा सुदूरपश्चिमके टमान जिल्लाके २८ स्थानसे सुपथ मूल्य पसल सञ्चालन हुइल जानकारी डेलै । ‘हम्रे सुपथ मूल्य पसलसे दुईमेरके चाउर ओ चिनी प्रतिकिलो पाँच छुटमे उपलब्ध करैटी बाटी,’ उहाँ कहलै, ‘सेवाग्राही लग्गेक सुपथ मूल्य पसलसे सेवा लेहे सेकही ।’

खाद्य व्यवस्था तथा व्यापार कम्पनी लिमिटेडसे सुदूरपश्चिमके कैलालीके धनगढी, डडेलधुराके खलंगा बजार, कञ्चनपुरके शाखा कार्यालय महेन्द्रनगर, डोटीके खलंगा बजार ओ मौवानगर खरिद–बिक्री केन्द्रमे सुपथ मूल्य पसल सञ्चालन हुइना बा । ओस्टके, बाजुराके शाखा कार्यालय मार्तडी, डिपो कार्यालय कोल्टी, धुलाचौर बिक्री केन्द्र, बिच्छाया बिक्री केन्द्र ओ पाण्डुसैन बिक्री केन्द्र रहल बा ।

बैतडीके गोठालापानी ओ परचौडीहाट बिक्री केन्द्र, रोलेश्वर, आम्चौरा ओ दोगडाकेदार खरिद–बिक्री केन्द्रसे सञ्चालन हुइना बा । दार्चुलाके शाखा कार्यालय, सुनकेसरा बिक्री केन्द्र, हिकिला ओ खण्डेश्वरी खरिद बिक्री केन्द्रसे सुपथ मूल्य पसल सञ्चालन हुइल बा । अछामके शाखा कार्यालय मंगलसेन, सैनाबजार, साफेबगर ओ कमल बजार खरिद–बिक्री केन्द्रसे सञ्चालन हुइल बा ।

साल्ट ट्रेडिङ कर्पोरेसन लिमिटेडके सुदूरपश्चिम कार्यालय प्रमुख तेजबहादुर कँुवर सुदूरपश्चिमके आठ स्थानसे सुपथ मूल्यके पसल सञ्चालन हुइल जानकारी डेलै । उहाँ साल्ट ट्रेडिङसे सञ्चालन हुइना सुपथ मूल्य पसलमे नोनमे प्रतिकिलो दुई, चिनीमे प्रतिकिलो पाँच, तेल चिउरा, पीठा मैदा ओ दालमे प्रतिकिलो सात छुट डेना बटैलै । डडेल्धुरा, कैलालीके धनगढी, टीकापुर ओ अत्तरिया, कञ्चनपुरके बेलौरी ओ महेन्द्रनगर, डोटीके दिपायल, बैतडीके पाटनसे सुपथ मूल्य पसल सञ्चालन हुइल साल्ट ट्रेडिङ जनैले बा ।