क्षमता नेतृत्व विकास तथा लैङिक हिंसा न्यनिकरणके लाग ऐन कानून सम्बन्धी दुई दिने तालिम सुरु

पहुरा समाचारदाता
धनगढी, ३ कुवाँर । कैलाली जिल्लाके कैलारी गाउँपालिका वडा नम्बर ७ छटकपुर बसन्तामे क्षमता नेतृत्व विकास तथा लैङिक हिंसा न्यनिकरणके लाग ऐन कानून सम्बन्धी दुई दिने तालिम शुकके रोजसे सुरु हुइल बा ।

सुइटी सामुदायिक वन उपभोक्त समुह ओ खौरहवा शिव सामुदायिक वन उपभोक्ता समुहके आयोजना तथा दलित महिला अधिकार मञ्च कैलाली, डिसिएके समन्वयमे सामुदायिक वनकेउपभोक्ता सदस्यहुकनके क्षमता नेतृत्व विकास तथा लैङिक हिंसा न्यनिकरणके लाग ऐन कानून सम्बन्धी दुई दिने तालिम सुरु हुइल हो ।

तालिम उदघाटन कार्यक्रम कैलारी गाउँपालिका कार्यपालिका सदस्य सुन्दरीदेवी चौधरीके बरका पहुनामे हुइल रहे । कार्यक्रममे मन्तव्य रख्टी उहाँ सामुदायिक वनसे कार्ययोजना ओ पारदर्शिता ढंगसे आघे बह्रलेसे केल्ह विकास हुइना बटैलै ।
उहाँ सामुदायिक वनके सक्कु उपभोक्ता सदस्यहुकनहे विधानबारे अध्ययन कैना जरुरी रहल बटैली । कैलारी गाउँपालिका वडा नम्बर ७ डुबान, जंगली जनावरके अतांक, लडियाकटानसँगे आगलागिके दृष्टिसे उच्च जोखिम हुइल ओरसे न्यूनिकरणके लाग समन्वय आवश्यक रहल बटैली ।

कार्यक्रममे डिभिजन वन कार्यालय बसन्ताकेवन रक्षक विश्वास धामी सामुदायिक वनमे महिला पुरुष दुनहुनहे ५०÷५० प्रतिशत हक अधिकार सुनिश्चितता करलेसेफे कार्यान्वयनमे नैआइल बटैलै ।

दलित महिला अधिकार मञ्च धनगढीके सहजकर्ता निलु चौधरी महिलाहुकनके नेतृत्व तथा क्षमता विकाससँगे उद्यमशिलताओर जोरेक लाग उपभोक्ता सदस्यहुकनके लाग तालिमके आयोजना करल बटैली । कैलारी गाउँपालिकामे ४८ ठो सामुदायिक वन मध्ये दलित महिला अधिकार मञ्च २५ ठो सामुदायिक वनमे टमान कार्यक्रम संचालन करटी रहल बटैली । उहाँ गैलबर्ष यी सामुदायिक वनसे सामाजिक उत्तरदायित्व बहन करेक लाग बालबालिकाहुकनहे छात्रवृत्रिमे सहयोग करल बटैली ।

तालिम उदघाटन कार्यक्रम खौरहवा शिव सामुदायिक वनके अध्यक्ष लेखराम चौधरीके अध्यक्षतामे हुइल रहे । कार्यक्रममे मन्तव्य रख्टी उहाँसामुदायिक वनके आम्दानीके कुछ प्रतिशत वन विकासंगे गरिबी निवारण, आयआर्जनमे खर्च करेपर्ना हुइल ओरसे उहे अनुसार आघे बह्रना बटैलै । सामुदायिक वनसे गर्भवती महिलाहुकन सहयोग, बालबालिकाहुकनहे छात्रवृति, बंगुर पालन, तरकारी खेतीमे सहयोग कैना योजना रहल बटैलै ।

महिलाहुक्रे लैङिक हिंसामे परलेसेफे हकअधिकारके लाग बोले नैसेक्ना उपभोक्ताहुकनके क्षमता नेतृत्व विकास ओ सामुदायिक वनके ऐन कानूनबारे जानकारी डेहक लाग समन्वय करल ओरसे दलित महिला अधिकार मञ्चहे धन्यवाद डेलै ।
कैलारीके ४८ ठो सामुदायिक वन मध्ये अपन सामुदायिक वनमे कार्यक्रम संचालन करलप्रति हार्दिक अभार व्यक्त करटी सामुदायिक वनहे नमुना बनैना सक्कु उपभोक्ता सदस्यके समन्वय जरुरी रहल बटैलै ।

कार्यक्रम संचालन खौरहवा शिव सामुदायिक वनकेसचिव महाविर चौधरीसे करल रहिट । उदघाटन कार्यक्रममे सुइटी सामुदायिक वनके अध्यक्ष रामचरण चौधरी, शिव मन्दिर व्यवस्थापन समितिके अध्यक्ष फुलपति चौधरी, सब डिभिजन वन कार्यालय बसन्ताके बनरक्षक शिवराज पाण्डे, महिला स्वास्थ्य स्वयं सेविका घुम्नी चौधरी, विद्यादेवी चौधरीलगायतके सहभागिता रहल रहे ।

दुई दिनसम संचालन हुइना क्षमता नेतृत्व विकास तथा लैङिक हिंसा न्यनिकरणके लाग ऐन कानून सम्बन्धी तालिममे सहजीकरण सरिता चौधरी करटी रहल रहिट ।