निसर्ग इन्डो नेपाल जुगेडा कप भलिबल प्रतियोगिता सुरु
पहुरा समाचारदाता
धनगढी, ५ कुवाँर । धनगढी उप–महानगरपालिका–१० जुगेडामे संयुक्त राना जनचेतना परिवारके आयोजनामे निसर्ग इन्डो नेपाल जुगेडा कप–२०८२ भलिबल प्रतियोगिता तथा सांस्कृतिक प्रदर्शन कार्यक्रम भव्य रुपमे सुरु हुइल बा ।
कार्यक्रम खेल संयोजक भगिरथ रानाके अध्यक्षतामे सम्पन्न हुइल उदघाटन समारोहमे सुदुरपश्चिम प्रज्ञा प्रतिष्ठानके उपकुलपति डा. टि.एन. जोशी प्रमुख अतिथि रहल रहिट ।
कार्यक्रममे सम्बोधन करटी डा. जोशी खेलकुद ओ संस्कृति दुनुहे समान महत्व डेना आवश्यक रहल उल्लेख करटी आयोजक समितिसे समुदायके अग्रसरतामे यैसिन कार्यक्रम सञ्चालन करलै प्रशंसनीय कार्य हुइल बटैलै ।
उदघाटन कार्यक्रममे स्वागत मन्तव्य डेटी आयोजक समिति सदस्य केबल रानासे नेपाल ओ भारतके १६ टिमबीच प्रतियोगिता हुइना जानकारी डेलै । उहाँ खेलकुद राष्ट्र चिन्हैना एक ठो प्रभावकारी माध्यम हुइल उल्लेख करटी सक्कुहे सहभागितामार्फत प्रतियोगिता सफल पर्ना आह्वान करलै ।
प्रतियोगितामे पहिल पुरस्कार १ लाख ६१ हजार, दुसर पुरस्कार ८१ हजार ओ टिसरा पुरस्कार ४१ हजार रहल बा ।
उदघाटन समारोहमे धनगढी उप–महानगरपालिका–७ के वडा अध्यक्ष मोती रानाथारुसहित स्थानीय जनप्रतिनिधि, प्रहरी, सञ्चारकर्मी, खेलाडी, समाजसेवी ओ बुद्धिजीवीहुकनके उल्लेखनीय उपस्थिति रहे ।
सांस्कृतिक प्रदर्शनओरसे जुगेडा गाउँके परम्परागत होरी नाच प्रस्तुत करल रहे । कलेसे रानाथारु समुदायके मौलिक परिकारसमेत प्रदर्शनीमे धारल बा ।
आयोजकके अनुसार यी प्रतियोगितामे धनगढी उप–महानगरपालिका–१० वडा कार्यालय संरक्षक ओ सुदुरपश्चिम खेलकुद परिषद् प्रवद्र्धकके रुपमे रहल बटै ।
