टीकापुर उद्योग वाणिज्य संघके नवनिर्वाचित कार्यसमितिके पदस्थापन
पहुरा समाचारदाता
टीकापुर, ६ कुवाँर । टीकापुर उद्योग वाणिज्य संघके नवनिर्वाचित कार्य समितिके पदस्थापन कार्यक्रम सोम्मारके रोज सम्पन्न हुइल बा ।
सन्तोष खड्काके अध्यक्षतामे हुइल पदस्थापन कार्यक्रमके प्रमुख अतिथि टीकापुर नगरपालिकाके मेयर रामलाल डगौरा थारु रहल रहिट । कार्यक्रममे बोल्टी उहाँ मेयर थारु टीकापुरके आर्थिक विकासमे संघसे महत्वपूर्ण भूमिका निर्वाह करल बटैलै । उहाँ निजी क्षेत्रके छाता संस्थाके रुपमे रहल संघसे अइना दिनमे समेत सकारात्मक भूमिका निर्वाह कैना विश्वास व्यक्त करले बटै ।
उहाँ नगरपालिका निजी क्षेत्रसंगे सहकार्य करके आघे बह्रना तयार रहल बटैललै । उहाँ विगत नम्मा समयसे ब्यापारी ओ नगरपालिकाबीच रहल घरभाडा विवादहे संवादके माध्यमसे समाधान कैना प्रतिवद्धता व्यक्त करले बटै ।
उहे अवसरमे संघके संस्थापक अध्यक्ष गोकर्णप्रसाद रिमाल युवाहुक्रे नेतृत्वमे आइल बाट खुशी महशुस हुइटी रहल बटैलै । उहाँ युवाहुक्रे समाजहे सुधारके डगरमे आघे बह्राई सेक्ना बटैै ।
पदस्थापन समारोहमे पूर्वअध्यक्षद्वय नरेशकुमार खत्री ओ आनन्द हमाल विगतमे संघसे करल महत्वपूर्ण कामके स्मरण करल रहिट ।
कार्यक्रममे सल्लाहकार गोपालप्रसाद चौधरी, कैलाली होटल व्यवसायी संघके अध्यक्ष खेमराज सिँह कुँवर, दुर्गौली बजार व्यवस्थापन समितिके अध्यक्ष चन्द्रभान बम लगायत मन्तव्य राखल रहिट ।
कार्यक्रममे उपस्थित अतिथि लगायतहे नवनिर्वाचित प्रथम उपाध्यक्ष अर्जुन भट्टराई धन्यवाद व्यक्त करल रहिट । कार्यक्रमके सञ्चालन पहिल सत्र निवर्तमान महासचिव नवराज रिमाल ओ दुसरा सत्र नवनिर्वाचित महासचिव प्रकाश उपाध्याय करले रहिट ।
संघके भदौ २१ गते हुइल निर्वाचनसे नयाँ कार्य समिति चयन करले बा । जेम्ने अध्यक्ष सन्तोष खड्का अत्याधिक मतान्तरसे विजयी हुइल रहिट । उहाशाक प्रतिस्पर्धी कृष्णप्रसाद उपाध्याय बजगाईहे ११३ मतके अन्तरसे पराजित करल रहिट ।
अध्यक्षमे विजयी खड्का निवर्तमान कार्य समितिके प्रथम उपाध्यक्ष ओ बजगाई उपाध्यक्ष रहिट । दुनु जाने दुई फरक प्यानलसे चुनावी मैदानमे उटरल रहिट ।
संघके प्रथम उपाध्यक्षमे अर्जुन भट्टराई, उपाध्यक्षमे दिपेन्द्र रावल, महासचिवमे प्रकाश उपाध्याय, सचिवमे प्रकाश शाह ओ कोषाध्यक्षमे टीका शाही पदस्थापन करले बटै । शाही संघमे पदाधिकारी जित्न पहिल महिला उम्मेदवार हुइट । यी आघे महिलाहुक्रे सदस्य पदमे केल्ह विजयी हुइल रहिट ।
संघके सदस्यमे उपेन्द्र बटाला, हेमन्त रिमाल, शैलेश साउँद, रुपकबहादुर बिष्ट, जनकबहादुर बिष्ट, विजय धामी, दीपक साउँद ओ सर्पराज साउँद पदस्थापन करले बटै ।
ओस्टेक करके आरक्षण ओरके सदस्यमे महिलाओर जानकी शाह, जनजातिओर सन्तोषकुमार कठरिया ओ दलितओर रमेश तिखातरी दमाई पदस्थापन करले बटै ।
ओइने सक्कुहुनहे निर्वाचन समिति प्रमुख रघुनाथ उपाध्याय पद तथा गोपनियताके सथप करैले रहिट । नवनिर्वाचित कार्य समितिके कार्यकाल आगामी तीन वर्ष रना बा ।
