आन्दोलनसे सिर्जित विनासपाछे सर्वसाधारणहे सहजे पैनामे समस्या

पहुरा समाचारदाता
धनगढी, ८ कुवाँर । अनौपचारिक क्षेत्र सेवा केन्द्र (इन्सेक) सुदूरपश्चिम प्रदेश कार्यलय, धनगढीके अयोजनामे मानव अधिकार रक्षक सञ्जालके नियमित बैठक मंगरके रोज धनगढीमे सम्पन्न हुइल बा ।

बैठकमे मानवअधिकार रक्षकहुक्रे गैल भदौ २३ ओ २४ गतेक आन्दोलनसे हुइल क्षति ओ अब्बेक अवस्थाबारे जानकारी डेटी प्रशासनिक भवनमे तोडफोड ओ आगजानी करलपाछे सर्वसाधारणहे स्थानीयस्तरसे पैना सेवा सहजे पाईनैसेकल बटैलै । नगरपालिका, गाउँपालिका, वडा कार्यालयमे भवनमे तोडफोड ओ आगजानी करलपाछे सर्वसाधारणहे सेवा पैनामे कर्रा हुइल भेटल बटैले रहिट ।

इन्सेक प्रदेश संयोजक खडकराज जोशी भदौ २३ ओ २४ गते जेनजी आन्दोलनके क्रमममे उत्पन्न संक्रमणकालिन अवस्थामे नागरिक समाज तथा मानव अधिकार रक्षकहुकनके भुमिकाहे सकृयरुपमे आघे बह्रैना उद्देश्यसे नियमित बैठकके आयोजना करल बटैलै ।

उहाँ कहलै— ‘भदौ २३ ओ २४ गते जेनजी आन्दोलनके क्रममे उत्पन्न परिस्थितिमे आ—आपन कार्य क्षेत्रमे रहल सरकारी कार्यालयके भौतिक संरचनाके क्षतिके यकिन विवरण संकलन करके नागरिकहे सेवा प्रवाह करेबेर चहना आवश्यक सामाग्री उपलब्ध करैना सक्कु सरोकारवालासंग समन्वय कैना ओ जटरा जैसिक सेक्छी ओसिक सहयोग करके सेवाग्राहीके अधिकार सुनिश्चित कैना सक्कु सरोकारवाला निकाय जिम्मेवार हुइना आवश्यक बा ।’

राष्ट्रिय मानव अधिकार आयोगके उपसचिव झंकर रावल राष्ट्रिय मानव अधिकार आयोगसे जेनजी आन्दोलनके क्रममे क्षति हुइल भौतिक संरचनाके अनुगमन करटी रहल हुइलेसेफे मानव अधिकार उलङ्घन हुइल अवस्थामे आयोगमे उजुरी डेना सक्कु आग्रह करलै ।

गैरसरकारी संघसंसथाके अध्यक्ष देवीप्रसाद खनाल भदौ २४ गते जेनजी प्रदर्शनके क्रममे टमान कारागारसे भागल कैदीवन्दीहुक्रे अपराधिक गतिविधि बह्राई सेक्ना सम्भावना डेखल ओरसे आ—आपन कार्यक्षेत्रमे सचेत हुके काम करेपर्ना बटैलै ।
ओेरेक नेपालके जिल्ला संयोजक गीता चौधरी कैलारी गाउँपालिकामे सरकारी कार्यालयमे हुइल तोेडफोड आगजनीके कारण नागरिकमे मानसिक त्रास फैलल ओरसे प्रभावित क्षेत्रके नागरिकहे मनोसामाजिक परामर्शके आश्यकता रहल बटैलै । जेनजी आन्दोलनके नाउँमे वडा कार्यालयके प्रशासनिक भवन ध्वस्त हुइलपाछे सेवा प्रदानमे असजता हुइल ओ दुर दुर रहल वडाबासी पालिकामे सेवा लेहे आइपर्ना पर्ना बटैली ।

फाया नेपालके अध्यक्ष गोमा अचार्य जेनजी आन्दोलनके कारण भारतीय सीमा नाकामे भारतसे लौटना ओ मजदुरी करेक लाग भारत जैना नेपाली नागरिकहुक्रे भारतीय प्रहरीसे टमान हिंसा खेपे परटी रहल बटैलै ।

जिल्ला अदालत बार एशोसिएशनके अध्यक्ष नाथुराम महतो जेनजी आन्दोलनके कारण उत्पन्न अशान्तिके कारण समाज ओ घरभिटरटमान हिसाके घटना घटटी रहल ओरसे बारसे निशुल्क कानुनी सेवा उपलब्ध करैना बटैलै । उहाँ कहलै, जेनजी आन्दोलनके कारण बारहेफे भारी क्षति हुइल बा । कैलाली जिल्लाके ८० प्रतिश मुद्दा उच्च अदालत दिपायलमे लरेपर्ना रहठ । जिहीहे दिपायल जाइक लाग ढेर खर्च हुइठ कहटी बारसे दुई ठो भर्चुअल इजलाससे सेवा प्रदान करटी आइल रहे । जेनजी आन्दोलनकारी जराइलपाछे सर्वसाधारणहे समस्या हुइल बा ।

मानव अधिकार रक्षक संजाल घोडाघोडी नगरपालिका संयोजक विरेन्द्र शाह जेनजी आन्दोलनसे नगरपालिका ओ सक्कु वडा कार्यालयके प्रशासनिक भवन ध्वस्त हुइलपाछे सेवा प्रदान कैनामे समस्या आइल बटैलै । उहाँ कहलै, नगरपालिका ओ सक्कु वडा कार्यालय भवन ध्वस्त हुइल बा । वहाँ रहल सारा समान जरके नस्ट हुइल बा । भवन पुर्ननिर्माण करे पर्ना अवस्था बा । नगरपालिका ओ वडा कार्यालयके समान जरके नष्ट हुइलबेला सर्वसाधारणहे सेवा डेना कर्रा हुइल बा ।

ओस्टेक मानव अधिकार रक्षक संजाल गोदावरी नगरपालिका संयोजक नरदिप धामीफे जेनजी आन्दोलनसे नगरपालिका ओ सक्कु वडा कार्यालयके प्रशासनिक भवन ध्वस्त हुइलपाछे सेवा प्रदान कैनामे समस्या आइल बटैलै ।

उ मानव अधिकार रक्षक सञ्जालके नियमित बैठकमे इन्सेक, राष्ट्रिय मानव अधिकार आयोग, गैरसरकारी संघसंस्था महासंघ, पत्रकार महासंघ, जिल्ला अदालत बार एशोसिएशन लगायत मानव अधिकारके क्षेत्रमे काम कैना टमान संघसंस्थाके उपस्थिति रहे ।