कैलारीमे अपांगता हुइल व्यक्तिहुकनहे सहायक सामाग्री वितरण
पहुरा समाचारदाता
धनगढी, ८ कुवाँर । बाल कल्याण संघ, वल्र्ड भिजन ईन्टरनेशनल नेपाल संयुक्त साझेदारी ओ कैलारी गाँउपालिका समन्वयमे बुधके रोज वडा नम्बर १, हसुलियामे अपांगता भएका व्यक्तिहुकनहे सहायक सामाग्री वितरण कैगिल बा ।
गाउँपालिका उपाध्यक्ष भगवतीकुमारी चौधरीके अध्यक्षतामे हुइल कार्यक्रममे यी पालिकाके टमान वडाके अपांगता हुइल व्यक्तिहुकनहे पाँच थान ह्वील चेयर ओ दुई थान ट्रई साईकल वितरण करल बा ।
कैलारी गा.पा. वडा नं. ७ के चन्द्र प्रकाश चौधरी ट्रई साईकल नैरहल कारण कक्षा ५ पास हुइल पश्चात विद्यालय छोरे परल ओ अब फेर विद्यालय पुनः भर्ना हुके अध्ययन कैना जानकारी करैलै ।
ओस्टेक यिहे पालिका वडा नं. ७ रबिता कुमारी चौधरी ह्विल चेयर पाके खुशी हुइल ओ दैनिक कृयाकलाप कैना सहज हुइना जानकारीके साथे उपलब्ध करैना संस्था बाल कल्याण संघ ओ वल्र्ड भिजन ईन्टरनेशनल नेपालहे धन्यवाद व्यक्त करलै ।
सामाग्री हस्तान्तरण पश्चात यी पालिकाके उपाध्यक्ष भगवती कुमारी चौधरी बाल कल्याण संघ ओ वल्र्ड भिजन ईन्टरनेशनल नेपाल अपांगता हुइल व्यक्तिहुकनके लाग सहयात्री बनल ओ अझ सहयोगके अपेक्षा रख्टी धन्यवाद व्यक्त करलै ।
सहायक सामाग्री हस्तारण कार्यक्रम यी पालिकाके महिला तथा बालबालिका शाखाके प्रमुख बालकुमारी चौधरी संचालन करलै । यी कार्यक्रममे ई.प्र.का., हसुलियाके प्रतिनिधि, बाल कल्याण संघके सामाजिक परिचालक नरेश चौधरी ओ प्रेम चौधरीके उपस्थिति रहे ।
