मुक्तकमैया, कम्लहरी तथा हलिया पुर्नस्थापना कार्यविधि कार्यन्वयनके लाग छलफल

पहुरा समाचारदाता
भजनी, १२ कुवाँर । कैलालीके भजनी नगरपालिकामे मुक्तकमैया, कम्लहरी तथा हलिया पुर्नस्थापना कार्यविधि कार्यन्वयनके लाग पालिका स्तरीय अन्तरक्रिया तथा छलफल कैगिल बा ।

भजनी नगरपालिकाके नगर प्रमुख केवल चौधरीके वरका पहुनामे हुइल कार्यक्रममे उहाँ मुक्तकमैया आन्दोलन ओ अगुवाहुकनहे सम्झटी “अब्बेक सरकार परिवर्तनशिल, आन्दोलनरत ओ कार्यविधि कार्यान्वयन कैना जरुरी रहल बटैलै ।
कार्यविधि अनुसार काम कैना कुछ चुनौती बा,’ उहाँ कहलै, ‘उ चुनौतीहे सहज बनाइक लाग मुक्तकमैयाहुकनके संगठनसेफे ओटरे भुमिका खेले परी । माया मोह त्याग करके कानुनी दायरा भिटर रहि काम कारवाही करलेसे सहज हुई ।’

मुक्तकमैयाहुकनके घर निर्माणके लाग काठ वापत एक लाख ओ घर निर्माणके लाग १० हजार रकम वितरण करे नैसेकल मने मुक्तकमैया पुनस्र्थापनाके लाग तयार रहल, कार्यविधि कार्यान्वयनके लाग पालिका प्रमुखके हैसियतसे पुुर्ण प्रतिवद्ध रहल उहाँ बटैलै । नगर उपप्रमुख राजु तिरुवा मुक्तकमैया, कम्लहरी तथा हलिया पुनस्र्थापना कार्यविधि बनाइल बटैली । उहाँ कहली, “कार्यविधि निर्माण पश्चात मुक्तकमैया तथा कम्लहरीहुकनके पहिचान ओ पुनस्र्थापना कैना सहज हुइना बटैली ।
नगर प्रवक्ता तथा वडा नं. ३ के वडा अध्यक्ष विक्रम चौधरी अब्बे प्रदेश ओ स्थानीय सरकारसे कार्यविधि बनाइल ओ विगतमे नगरपालिकासे ११८ जाने मुक्तकमैयाहुकनके लाग प्रतिव्यक्ति १ लाख १० हजार बजेट विनियोजना करल बटैलै ।
कमैयाहुकनहे पुनस्र्थापन करे सेक्जाई कहिके संघसम फे गैल मने कानूनी अड्चनसे सम्भव नैहुइल बटैलै । उहाँ शिक्षा, स्वास्थ्य, रोजगारीके व्यवस्था करेपर्ना, जग्गा फूकुवा हुईपर्ना बटैलै । कक्षा १२ सम निःशुल्क व्यवस्था करल बटैठी वि.ए.सीएजी प्राविधिकसम पहै्रना उहाँ बटैलै ।

भजनी न.पा. वडा नं. ७ मे कुल २२० जाने मुक्तकमैयामध्ये ११२ जाने मुक्तकमैया परिचयपत्र ओ अन्य सेवा सुविधा प्राप्त करल बटै कलेसे १७ जानेक राष्ट्रिय भुमि आयोगमे दर्ता करके निस्सा प्राप्त करले बटै । अभिनफे ८०÷९० जाने मुक्तकमैया छुटल वडा नं. ७ के वडा अध्यक्ष अमर बहादुर कठरिया बटैलै ।

मुक्तकमैया समाजके केन्द्रिय अध्यक्ष पशुपति चौधरी कार्यविधि अनिवार्य रुपमे कार्यन्वयन करेक लाग अनुरोध करटी कार्यविधि कार्यन्वयनके लाग वडास्तरके छलफल करके छुट कमैयाके पहिचान कैना, परिचयपत्र वितरण करके पुनस्र्थापनाके कार्य हाली करेपर्ना बटैल ।

मुक्तकमैया महिला जागरण समाज नेपालके अध्यक्ष कृष्णी थारु भजनी नगरपालिका मुक्तकमैयाहुकनके क्षेत्रमे एकदम सकारात्मक रहल बटैली ।

भजनी नगरपालिकासे मुक्तकमैया, कम्लहरी तथा हलियाके पहिचान, पुनस्र्थापना कार्य सम्पन्न कैना ओ वृत्ति विकासके कार्यक्रम सञ्चालन करके आत्मनिर्भर बनैटी जीवनस्तरमे सुधार ल्यन्ना आवश्यकता औल्याके सरोकारवाला संस्था, संघ, संगठनसंगके आवश्यक पहलमे मुक्तकमैया, कम्लहरी तथा हलिया पुनस्र्थापना कार्यविधि २०८१ पारित करले बा । उ कार्यविधि २०८२ असार २५ गते प्रमाणिकरण ओ २०८२ असार २७ गते स्थानीय राजपत्रमे प्रकाशित करले बा । साथे नगरपालिकासे सुदुरपश्चिम प्रदेशसे तयार करल कार्यविधिमे टेक्के मुक्तकमैयाहुकनके लगत संकलन कैना कार्यफे करले बा ।

एक्सन एड नेपालके सहयोग, भजनी नगरपालिकासंगके समन्व तथा कमैया महिला जागरण समाज नेपालके सहकार्य ओ मुक्तकमैया समाज, भजनी कैलालीके आयोजनामे कार्यक्रम हुइल रहे । मुक्तकमैया समाज नगर समिती अध्यक्ष तेसराम चौधरीके सभाध्यक्षतामे हुइल कार्यक्रममे वडा अध्यक्षहुक्रे, भजनी नगरपालिकामे कार्यरत अधिकृत पुर्ण जोशी, फ्रिडम फण्ड के कानुनी सल्लाहकार बालाराम भट्टराईलगायतकेफे सहभागिता रहे ।