दलित महिला अधिकार मञ्चसे कैलारीहे सहयोग

पहुरा समाचारदाता
धनगढी, १२ कुवाँर । दलित महिला अधिकार मञ्च कैलालीसे डिसिएके आर्थिक सहयोगमे कैलारी गाउँपालिकाहे सहयोग करले बा ।

कैलारी गाउँपालिकाके कार्यालय संचालन कैनामे सहज होए कहिके अँटवारके रोज दलित महिला अधिकार मञ्च कैलालीसे डिसिएके आर्थिक सहयोगमे कैलारी गाउँपालिकाहे सहयोग करल हो । मञ्चके सहजकर्ताहुक्रे निलु चौधरी ओ सीमा चौधरीले गाउँपालिका उपाध्यक्ष भगवतीकुमारी चौधरी, वडा–४ के वडाध्यक्ष ठागुराम चौधरी, वडा–२ के वडा अध्यक्ष विकास चौधरीहे प्रिन्टर ओ स्क्यानर एक थान, टेबल एक थान, दराज एक थान, कुर्सी १० पिस हस्तान्तरण करल रहिट ।

गैल भदौ २४ गते जेनजी आन्दोलनके नाउँमे अराजक समुहसे सार्वजनिक सम्पति गाउँपालिका तथा वडा कार्यालयके सरसामान तोडफोड ओ आगजानी करके ध्वस्त बनाइलपाछे गाउँपालिका तथा वडा कार्यालयसे सर्वसाधारण जनताहुकनहे सेवा प्रवाह कैना समस्या हुइल बा । आगजानीसे पालिकाके मुख्य मुख्य शाखा तथा वडा कार्यालयके सक्कु सामान जराके ध्वस्त बनाइल बा । अब्बे वडा कार्यालयसे प्रदान कैना सेवा पालिकासे डेना बाध्यता आइल बा ।