टिम्बर ट्रपिकल रिट्रीट होटल सञ्चालनमे
पहुरा समाचारदाता
नवलपुर, १४ कुवाँर । पर्यटन व्यवसायमे आघे बह्रटी रहल नवलपुर (पूर्वी नवलपरासी) मे टिम्बर ट्रपिकल रिट्रीट होटल सञ्चालनमे आइल बा ।
नेचरगाइड देवेन्द्र महतो ओ होटल म्यानेजमेन्ट अध्ययनरत उहाँक छावा सिलाससे कावासोती नगरपालिका–१५ शेरगञ्जमे टिम्बर ट्रपिकल रिट्रीट होटल सञ्चालनमे ल्यानल हुइट । महतोके बाबाडाई बिकनकुमारी थरुनी ओ रुपनारायण महतो मंगरके रोज संयुक्त रुपमे होटलके उद्घाटन करलै ।
सुन्दर, शान्त, प्राकृतिक वातावरण ओ रैथाने थारु परिकारसंग रमाई चाहल पहुनाहे लक्षित करके होटल सञ्चालन करल सञ्चालक महतो बटैलै । उहाँक होटलमे घोङ्घी, मच्छरी, बक्टी, चिचर, सोझुवा रोटी लगायतके थारु परिकारसहित पहुनासे अर्डर करल अनुसार चाइनिज लगायत अन्य खैनाचिजके परिकार उलब्ध करैना जानकारी डेलै । “हमार विशेष परिकार भर रैथाने थारु खाना रहल बा”, सञ्चालक महतो कहलै ।
काठ, बाँस लगायत वनजन्य सामग्री प्रयोग करके बनाइल होटलके वरपर रुखुवा ओ बोटविरुवा रहल बटै । शेरगञ्जके ढेङग भागमे रहल होटलसे चितवन राष्ट्रिय निकुञ्जसहित बाघखोर होमस्टेके सुन्दर दृश्य विल्गैना करठ । होटल परिसरमे सिजन अनुसार टमान मेरके आगन्तुक चिरैचुरुङ्गी अइना करल बटै ।
गर्मी याममे स्वर्गचरी, कोइली लगायतके पहुना चिरै उ ठाउँमे ठाँठ बनाके बच्चा हुरकैना करल महतो जानकारी डेलै । ओस्टेक करके, रैथाने टमान प्रजातिके चिरै जटराफे बेला डेखा पर्ना करल जनाइल बा । चिरैचुरुङ्गी, प्रकृति ओ स्थानीय थारु संस्कृतिसंग रमैना चाहल पर्यटकके लाग अपन होटल उपयुक्त गन्तव्य बने सेक्ना महतो उल्लेख करलै । उहाँ डण्डा बजार ओ कावासोती बजारके डगर हुके होटलसम पुगे सेक्ना जानकारी डेलै ।
होटल उद्घाटन कार्यक्रममे अमेरिका बैठटी आइल कावासोती नगरपालिका–१५ गोडारके राजु महतो, कैलालीके धनगढीके अविनाश चौधरी, होटल व्यवसायी बिनु महतो लगायतके उपस्थिति रहल रहिट ।
