कैलारी–५ मे फुटवल रनिङ कप प्रतियोगिता सुरु

पहुरा समाचारदाता
पवेरा, २१ कुवाँर । कैलाली जिल्लाके कैलारी गाउँपालिका वडा नम्बर ५ पलियाके खेलकुद मैदानमे वडा स्तरीय फुटवल रनिङ कप प्रतियोगिता सुरु हुइल बा ।

पवेरा गाउँ सामुदायिक संस्था कैलारी–५ पवेराके आयोजना तथा पहुरा दालमोठ प्रालि ललितपुर, नेपालके मुख्य प्रायोजक ओ ज्योति आइल(कनरी), प्रेमा एग्रो धनगढीके सह प्रायोजकमे वडा स्तरीय फुटवल रनिङ कप प्रतियोगिता हुइटी रहल हो ।
कैलारी गाउँपालिका वडा नम्बर ५ के वडा अध्यक्ष विष्णु प्रसाद चौधरीके वरका पहुनामे हुइल खेलकुद उदघाटन कार्यक्रममे विशिष्ट पहुनामे कैलारी गाउँपालिकाके योजना शाखा प्रमुख सन्तोषकुमार चौधरी ओ पहुरा दालमोठ प्रालि ललितपुर, नेपालके प्रमुख टीकाराम चौधरी रहल रहिट ।

कार्यक्रममे सम्बोधन करटी वरका पहुना वडा अध्यक्ष विष्णुप्रसाद चौधरी खेलकुदसे अनुशासन सिखैनाके साथे घरेलु खेलाडीहुकन छनौट कैना माध्यम बनल बटैलै ।

पवेरा गाउँ सामुदायिक संस्था कैलारी–५ पवेराके अध्यक्ष खुशीराम चौधरीके अध्यक्षतामे हुइल कार्यक्रममे पवेरा गाउँक भल्मन्सा रामबहादुर महतों, स्थानीय बुद्धिजिवीहुकनके सहभागिता रहल रहे । कार्यक्रमके संचालन इन्द्रश्याम चौधरी करल रहिट । ओस्टेक पवेरा गाउँ सामुदायिक संस्था कैलारी–५ पवेराके सचिव विपराम चौधरीके अध्यक्षतामे हुइल खेलकुद कार्यक्रम हुइटी बा । उदघाटनके रोज सोम्मार तीन ठो खेल हुइल बा ।

पहिल खेल पवेरा ओ बैसपुर हुइल रहे । जेम्ने दुनु गाउँक टिम विच कडा प्रतिस्पर्धा हुइलबेर दुनु गाउँक टिम २÷२ गोल मारके बराबर हुइल रहिट । पाछे पेनाल्टी सुटआउटमे बैसपुर १ मारल कलेसे पवेरा ओकर विरुद्ध २ गोल मारके विजयी हुइल रहे ।
ओस्टेक छुटकी पलिया ‘वि’ ओ पवेरा बजारके टिम विच हुइल खेलमे पलिया ३ गोल ओ पवेरा बजार अक्के गोल मारे नैसेकल आयोजक जनैले बा ।

ओस्टेक मन्कापुर ओ छुटकी पलिया ‘ए’ विच हुइल खेलमे मन्कापुर २ गोल ओ छुटकी पलिया ‘ए’ १ गोल मारल रहे । प्रतियोगिताके विजेता ६ हजार रुप्या, प्रमाणपत्र ओ ट्रफी पैही कलेसे उपविजेता ४ हजार रुप्या प्रमाणपत्र ओ ट्रफी पैही । ओस्टेक वेष्ट प्लेयर ओ वेष्ट गोलरक्षक ५÷५ सय रुप्या पैना आयोजक जनैले बा । खेलकुदके एम्पायरमे चन्द्र चौधरी रहल बटै । प्रतियोगिताके फाइनल खेल बुधके रोज सम्पन्न हुइना जनागिल बा ।