मानसिक स्वास्थ्य सम्बन्धी अन्तरक्रिया
पहुरा समाचारदाता
धनगढी, २४ कुवाँर । विश्व मानसिक स्वास्थ्य दिवसके अवसरमे अपाङता रहल व्यक्ति ओ कैलारी गाउँपालिका विच छलफल तथा अन्तरक्रिया कार्यक्रम कैगिल बा ।
कोसिसके आयोजना एकता नेपाल, ओरेक नेपाल ओ अपाङता भएका महिलाहरुको महासंघ, सिडिसी, सिविन नेपाल, एमडिएस, फेडो, डिडिएचआरडीके सहकार्यमे विश्व मानसिक स्वास्थ्य दिवसके अवसरमे १० मेरिक अपाङता रहल व्यक्तिहुकनके सवालबारे छलफल कैगिल हो ।
छलफल कार्यक्रममे उहाँहुक्रे गाउँपालिकाहे १२ बुँदे माग राखल रहिट । जेम्ने महिला, बालबालिका अपाङगता हुइल व्यक्ति, लैङिक तथा अल्पसंख्यक समुदायके अर्थपूर्ण सहभागिताके सुनिश्चितता हुइपर्ना, सार्वजनिक भौतिक संरचना अपाङता ओ लैङिकमैत्री हुईपर्ना माग राखल बा ।
सूचनाके पहँुच अभिवृद्धि कैना प्रभावकारी संचारसहित दोभासेके व्यवस्था करेपर्ना, सामाजिक सुरक्षा भत्ता वितरण प्रक्रिया सरलीकृत हुईपर्ना, अपाङता हुइल व्यक्तिके तथ्यांक अध्यवधिक कैना करके पालिकासे सहजीकरण कैना ओ मनोसामाजिक अपाङता हुइल व्यक्तिनहे परिचयपत्र सहजरुपमे उपलब्ध कराईपर्ना माग करल बा ।
लैङिक अल्पसंख्यक तथा यौनिक संख्यकके तथ्यांक संकलन करके सेवा सुविधामे पहुँच वृद्धि करेपर्ना, स्थानीय स्तरसे प्रवाह हुइना सूचना पहुँचयुक्त बनैना माग करल बा ।
वस्तीस्तरीय योजना तर्जुमा प्रक्रियाहे पूर्णरुपमे कार्यान्वयनमे ल्यानेपर्ना, न्यायिक समितिमे गैल मुद्दाहे प्रभाव कार्यान्वयन समितिके काम कर्तव्य उप्पर जनचेतना अभिवृद्धि करेपर्ना माग करल बा ।
ओस्टेक करके अपाङता हुइल व्यक्तिनहे स्वास्थ्य सेवापूर्ण रुपमे निशुल्क हुईपर्ना, लक्षित वर्गहे उद्यमशिलतामे जोरके आत्म निर्भर बनैना पहल करेपर्ना, बालमैत्री स्थानीय शासन युक्त हुइटी पालिका घोषणा कैना प्रक्रियामे कार्यान्वयनमे ल्यानेपर्ना माग करल बा ।
अन्तरक्रिया तथा छलफल कार्यक्रममे कार्यक्रममे गाउँपालिका उपाध्यक्ष भगवतीकुमारी चौधरी मानसिक स्वास्थ्य समस्याके विमारी बह्रटी गैल बटैली ।
उहाँ कहली, हरेक व्यक्तिनहे मानसिक स्वास्थ्य समस्या रहठ । मने केकरमे कटरा बा कना केल्ह हो । जेकरमे ढेर समस्या हुइठ ओइने केल्ह डेखावटी रुपमे बाहेर अइठै ।
गैरसरकारी संस्थासे अपाङता लगायत सीमान्तकृत समुदायमे माग मुद्दाबारे बुझाइल माग उप्पर छलफल करके आघे बह्रना उहाँ बटैली ।
कार्यक्रममे वडा नम्बर ३ के वडा अध्यक्ष सन्तराम चौधरी, प्रमुख प्रशासकीय अधिकृत खगेन्द्रराज जोशी, सामाजिक विकास शाखा प्रमुख यगम कलेल, महिला तथा बालिका शाखाके प्रमुख बालकुमारी चौधरी, एकता नेपालके कार्यक्रम निर्देशक राज चौधरी, कोसिसके चन्द्रकान्त पनेरुलगायतके १० मेरिक अपाङता भिटर पर्ना व्यक्तिहुकनके सहभागिता रहे ।
