घोडाघोडीमे एक युवकके हत्या

पहुरा समाचारदाता
धनगढी, २५ कुवाँर । कैलालीके घोडाघोडी नगरपालिका वडा नम्बर ८ जरैमे शुकके रात एकजनहनके घाँटी रेटके हत्या करल बा । संगे बैठके मदिरा सेवन करल तीन जाने मध्ये आपसी विवादके क्रममे दुई जाने घाँटी रेटी एकके हत्या करल जनाइल बा ।

ईलाका प्रहरी कार्यालय सुखडका प्रमुख प्रहरी नायब उपरीक्षक रमेशदत्त अवस्थी शुकके रात ११ बजे केशरबहादुर बुढाके घाँटी रेटके हत्या करल जानकारी डेलै । उहाँ उहे वडाके १८ वर्षीय बलबहादुर विक ओ १९ वर्षीय गंगा बुढा क्षेत्री हत्या कैके कपार लेके उहे वडाके प्रतिखेतमे रहल अस्थायी प्रहरी पोष्ट पुगल जानकारी पैटी किल अपने स्वयं घटनास्थल पुगल बटैलै ।

उहाँ हत्यामे संलग्न डुनु जनहनहे पक्राउ करल बटैदै । प्रहरी नायब उपरीक्षक अवस्थी सँगे मदिरा सेवन कैके घर अइना क्रममे विवाद होके डाइहे गरियाइलपाछे कुटपिट करेबर ढलल्पाछे लग्गे घर रहल एकजाने घरमे रहल गरसा लानके घाँटी रेटके हत्या कैके कपार लेके प्रहरीकहा पुगल उहाँहुक्रे सुरुमे बयान डेहल बटैलै ।