कैलारी नागरिक अभियानसे पाँच बुँदे ज्ञापनपत्र बुझागिल
पहुरा समाचारदाता
धनगढी, २६ कुवाँर । कैलारी नागरिक अभियानसे कैलारी गाउँपालिकाहे पाँच बुँदे ज्ञापनपत्र बुझैले बा ।
नागरिक अभियानके संयोजक लखन चौधरीके नेतृत्वमे गैल टोलीसे गाउँपालिका उपाध्यक्ष भगवतीकुमारी चौधरीहे पाँच बुँदे ज्ञापनपत्र बुझाइल हो ।
ज्ञापनपत्रमे सक्कु वडा कार्यालयके सेवा प्रवाह सम्बन्धित वडासे ३ दिन भिटर सुचारु करेपर्ना, आर्थिक वर्ष २०८२/०८३ के विनियोजित बजेटमे चालू ओ पूँजीगत आमजनसमुदायके माग ओ आवश्यकता ओ प्राथमिकताके आधारमे बजेट संशोधन करके विशेष सभासे बजेट संशोधन करके कार्यान्वयन करेपर्ना माग करल बा ।
स्थानीय सरकार संचालन ऐन २०७४ के दफा ७८ उपदफा ५ बमोजिम सार्वजानिक सेवा प्रवाहहे पारदर्शी, उत्तरदायी ओ जवाफदेही बनैना सार्वजनिक परीक्षण, सामाजिक परीक्षण तथा सार्वजनिक सुनुवाई कार्यक्रम आर्थिक वर्षके प्रत्येक चौमासिकमे करेपर्ना व्यवस्था रहल ओरसे उहे अनुसार सार्वजनिक करेपर्ना, आर्थिक बर्ष २०८२/०८३ के विनियोजित बजेट तथा वार्षिक कार्यक्रम सार्वजनिकीकरण जनस्तरसम करके सूचनाके हक प्रत्याभूति करेपर्ना माग करल बा ।
किसानहुकनके धान खरिख विक्रीके लाग नेपाल सरकारके धान खरिद समर्थन मुल्यमे विक्री वितरण कैना तत्काल खाद्य व्यवस्था व्यापार कम्पनी लिमिटेडसंग सहकार्य करके व्यवस्थापनसहित सूचारु करेपर्ना माग करल बा ।
ओस्टेक करके कैलारी गाउँपालिका भिटर संचालन हुइल योजना गुरगीय सिचाई, योजना, बरका मुडास्थित सुर्मीनाला पुल, गुरहा पुल निर्माण योजनाके कार्य अघे बह्रैना पहल करेपर्ना माग करल बा ।
