स्पष्ट नीतिबिना काम करना समस्या
पहुरा समाचारदाता
धनगढी, २६ कुँवार । सुदूरपश्चिम प्रदेशमे ऐन, कानुन बनाके स्पष्ट नीतिबिना आघे बहैना कार्यान्वयनमे समस्या डेखाइल प्रदेशसभाके सदस्य ओ सरोकारवालाहुक्रे बटैले बटैं ।
नीति, निर्माणहे पहिल प्राथमिकतामे ढैके ओकर आधारमे ऐन, नियमावली तथा कार्यक्रम नन्ना उपयुक्त हुइना उहाँहुकनके सुझाव बा ।
धनगढीमे आयोजित सुदूरपश्चिम प्रदेश पर्यटन ऐन, २०७७ के समीक्षा कार्यक्रममे सहभागी वक्ताहुक्रे ऐन बनाइबेर स्थानीय वस्तुस्थिति ओ पर्यटनके सम्भावनाहे पर्याप्त अध्ययन नैकैके कार्यान्वयनमे कठिनाइ आइल बटैले बटैं ।
पाँच वर्षआघे बनल पर्यटन ऐन अभिन कार्यान्वयन हुइ नैसेकल, सामाजिक विकास समितिके सभापति धर्मराज पाठक कलैं, “नीतिबिना ऐन बनैलेसे अइसिन समस्या आइठ, आब नीति बनाके विद्यमान ऐनहे संशोधन ओ परिमार्जन करना अपरिहार्य हुइल बा ।”
अर्थ विकास तथा प्राकृतिक स्रोत समिति सदस्य शिवसिंह ओली ऐन कार्यान्वयनमे नैआइल सन्दर्भमे संसदीय समिति स्तरसे आवश्यक पहल करना प्रतिबद्धता व्यक्त करलैं । यी ऐन ढेर नियमनमुखी बा, मने प्रवर्धनमुखी बने सेकल नैहो,” उहाँ कलैं ।
प्रदेश नीति तथा योजना आयोगके सदस्य कर्णबहादुर कुँवर ऐन ओ नीति बनाइबेर सरोकारवालासँग राय लेना परम्परा नैरहल ओ सरकार व्यवसायहे सहयोग करनाके सट्टा करके बोझ किल थोपारल गुनासो करलैं ।
पर्यटन व्यवसायी प्रमोद पाठक ओ दिनेशराज भण्डारी प्रदेशमे पर्यटनके अपार सम्भावना रलेसे फेन राज्य प्रवर्धनमुखी नीति नैलेहल बटैलैं । भण्डारी ऐन खारेज करनासे फेन समयअनुकुल संशोधन करना उपयुक्त रना सुझाव डेलैं ।
होटल व्यवसायी संघ कैलालीके पूर्व अध्यक्ष कलमबहादुर बम ऐनहे अधुरो, अपुरा ओ हास्यास्पद बा कलैं । ऐनसे सहयोग करनाके साटो अवरोध करले बा, उहाँक आरोप रहे ।
नेपाल पर्यटन व्यवसायी महासंघके पूर्व प्रदेश अध्यक्ष मायाप्रकाश भट्ट प्रदेशस्तरीय पर्यटन गुरुयोजना अपरिहार्य हुइल बटैलैं । ऐनमार्फत सरकारसे दण्डात्मक उपाय किल लेहल बा, आब संशोधनमार्फत विकासके ढोका खोल्न ढिलाइ करे नैपरल,” उहाँ कलैं ।
समीक्षा कार्यक्रममे अधिवक्ता कुलानन्द उपाध्याय ऐनके विशेषता, सवल ओ दुर्वल पक्षबारे प्रस्तुत करटि संशोधन आवश्यक बुँदा उल्लेख करले रहैं । कार्यक्रम युएनडीपी संसद सहयोग परियोजनाके सहयोगमे सञ्चार प्रतिष्ठान नेपाल, कैलालीके आयोजनामे हुइल रहे ।
