सामाजिक उत्तरदायित्व सक्कु जाने कैना जरुरीः गाउँपालिका उपाध्यक्ष

पहुरा समाचारदाता
धनगढी, २७ कुवाँर । लैङिक उत्तरदायी ओ समावेशी शासन प्रवद्र्धनके लाग सामाजिक उत्तरदायित्व सम्बन्धी दु्ई दिने अभिमुखीकरण कार्यक्रम सम्पन्न हुइल बा ।
ओरेक नेपालके आयोजना तथा यूएन वुमन ओ सौमी फिनल्याण्डके सहयोगमे रुपान्तरणका लागि सँगसँगै परियोजना अन्र्तगत महिला नेतृत्वहे सशक्त बनैना ओ लैङिक उत्तरदायी बनैना उद्देश्यसे अभिमुखीकरण हुइल रहे ।
कैलारी गाउँपालिका उपाध्यक्ष भगवतीकुमारी चौधरीके बरका पहुनामे हुइल समापन कार्यक्रममे सक्कु जानेक समन्वय ओ सहकार्यसे केल्ह विकास हुइना बटैली । पालिकासे संचालन हुइना योजना कार्यक्रमके सूचना पैना सक्कु जानेक अधिकार रहल ओ खोजनीति कैना जरुरी रहल बटैली । गाउँपालिकासे वेरोजगार यूवा तथा महिलाहुकनहे सीपसंगे रोजगारीमे जोरेक टमान मेरिक तालिम संचालन करल मने तालिक लेहुवा चासो डेहे कार्यान्वयनमे ल्यानेपर्ना बटैली ।
कार्यक्रममे कैलारी गाउँपालिकाके महिला तथा बालबालिका शाखा प्रमुख बालकुमारी चौधरी सिमित बजेटके कारण योजना अनुसार काम करे नैसेकल मने करल काम पारदर्शि हुईपर्ना बटैली । कार्यक्रमके सहजकर्ता ठाकुर प्रसाद करियाप्रधान सामाजिक जवाफडेहिताके लाग सेवा प्रदायक ओ सेवाग्राही दुनु जाने जिम्मेवार हुई पर्ना बटैलै ।
कार्यक्रममे सहभागी निरङ चौधरी ओ गौरी शंकर चौधरी दुई अभिमुखीकरणसे लैङिक उत्तरदायी ओ समावेशी शासन प्रवद्र्धनके लाग सामाजिक उत्तरदायित्व सम्बन्धमे काम कैना सहजुल हुइना बटैलै । कार्यक्रम संचालन करटी ओरेक नेपालके प्रदेश संयोजक सपना थापा सामाजिक जवाफदेहिता सिद्धान्त ओ उपकरणके बुझाईमे बढावा डेना, जवाफडेहिताके लागि लैङिक उत्तरदायित्व, दृष्टिकोणहे बढावा डेना उद्देश्यसे कार्यक्रम करल जनैली ।
कार्यक्रममे ओरेक नेपाल कैलाली जिल्ला संयोजक गीता चौधरी, कैलारी गाउँपालिकाके टमान क्षेत्रमे कार्यरत महिला तथा पुरषहुकनके सहभागिता रहे ।
