कैलारीके वडा कार्यालयसे सम्बन्धित वडासे सेवा प्रवाह

पहुरा समाचारदाता
हसुलिया, ३० कुवाँर । कैलालीके कैलारी गाउँपालिकाके अधिकांश वडा कार्यालय अपने वडासे सेवा सुचारु करले बा ।

जेनजी आन्दोलनके क्रममे गैल भदौ २४ गते आगजनिमे परके पालिकासे सेवा प्रवाह करटी रहल वडा कार्यालयसे अपने वडासे सेवा डेहे लागल हो । सेवा प्रवाहके लाग आवश्यक स्रोत साधनके अभावसे गाउँपालिकाके सम्पूर्ण वडा कार्यालय हसुलियासे सेवा डेटी रहल रहिट । उहीसे आमनागरिकहे ढेर सास्ती भोगे परल रहे । सम्बन्धित वडासे सेवा प्रवाहके विकल्पके पहिचान कैके सेवा सुचारु करे पर्ना जनदवाबपाछे वडा कार्यालय सम्बन्धित वडासे सुचारु करे लागल हो ।

नागरिक अभियान कैलारीसे वडा कार्यालयके सेवा सम्बन्धित वडासे प्रवाह करे पर्ना मागसहित इहे कुवाँर २६ गते ज्ञापनपत्र बुझाइल रहे ।

कैलारी गाउँपालिकाके सूचना अधिकारी यगम कलेलके अनुसार ९ मध्ये अधिकांश वडासे सुचारु करसेकल बटैलै ।

गाउँपालिकाके वडा नंं १, २, ५ ओ ८ से वडासे सेवा सुचारु करसेकल बावै। १ ओ २ नं. वडासे अपने भवनसे सेवा सुचारु करले बावै । वडा नं. ५ से पहिलेक भवनसँगे रहल औरे भवनसे सेवा डेहे लागल बा । वडा नंं ८ भर उसासीपुर प्राथमिक स्वास्थ केन्द्रके पुरान भवनसे सेवा डेटी रहल बा । बाँकी वडा कार्यालय फेन दुई दिनभित्रे सारसेक्ना जनाइल बा । वडा नं. ३ से वहाँ स्थित क्लबके भवनसे, वडा नंं ४ से आधारभुत स्वास्थ्य केन्द्रके हल या स्तनपान कक्षसे सेवा डेना तयारी करल जनाइल बा ।

वडा नं. ६ से खरेट्टीस्थित स्कूलके भवनसे सेवा डेना तयारी करले बा । ओस्टके, वडा नं. ७ से वहाँ स्थित प्राथमिक स्वास्थ्य केन्द्रके भवनसे सेवा डेना तयारी करल वडाध्यक्ष दीपेन्द्र बम जानकारी डेलै । कार्यालयके लाग प्रिन्टर अभाव रहलेसे फेन कुवाँर ३० गते बिफेक रोजसे सेवा डेहल बटैलै । ओस्टके, वडा नं. ९ से वहाँ स्थित भलमन्साहुक्रनके बैठक घरसे सेवा डेना तयारी करल जनाइल बा ।