महिला वातावरण रक्षक सम्बन्धी एक दिने क्षमता अभिवृद्धि तालिम
पहुरा समाचारदाता
धनगढी, ३० कुवाँर । कैलारी गाउँपालिकास्थित २५ ठो समुदायिक वन उपभोक्ता समुहमे रहल महिलाहुकनहे महिला वातावरण रक्षक सम्बन्धी एक दिने क्षमता अभिृवृद्धि तालिम डेहल बा ।
दलित महिला अधिकार मञ्च कैलालीके आयोजना तथा डिसिएके सहयोगमे रेसिस्ट परियोजना अन्तर्गत समुदायिक वनमे रहल महिलाहुकनहे क्षमता अभिवृद्धि सम्बन्धी तालिम डेहल मञ्चके कार्यक्रम व्यवस्थापक सृजना पराजुली जानकारी डेली ।
मञ्चसे सामुदायिक वनहे सहयोग कैना उद्देश्यसे सुशासन, पारदार्शि, महिला शक्तिकरण, समावेशी, स्रोत बाँडफाँड करेबेर सक्कुहुनहे पहुँच योग्य बनैना जोड डेटी रहल उहाँ बटैली । उहाँ कहली, वन जंगल जोगैना, संरक्षण कैना महिलाहुकनके भूमिका ढेर रहठ । सामुदायिक वन संरक्षण करेबेर ढेर चुनौती आईसेकठ, महिला वातावरण रक्षक हुइल कारण हिसा हुई सेकठ ।’
स्थानीय समयन्त्रसँग सहकार्य करके जाईपर्ना ओ कुहीहे हिंसा हुइलेसे उद्धार कैसिक कहिके क्षमता अभिवृद्धि तालिम डेहल व्यवस्थापक पुराजुली जानकारी डेली । कैलारी गाउँपालिका उपाध्यक्ष भगवतीकुमारी चौधरीके प्रमुख आतिथ्यतामे हुइल कार्यक्रममे उहाँ महिला हुइलक कारण अभिन हेप्ना, चेप्ना करल बटैली । नेपालके कानूनमे महिलाहे ३३ प्रतिशत सहभागिताके सुनिश्चित करल आधारमे सहभागिता कराइल मने निर्णायक भूमिकासे बञ्चित कराइल बटैली ।
महिलाहुकन उप्पर हिंसा बह्रटी रहल ओरसे आव महिलाहुक्रे एकजुट हुके लागेपर्ना उहाँ बटैली । पार्टी जौनफे हुइलेसेफे महिलासे महिलाहे सहयोग नैकरटसम महिला नेतृत्व तहसम पुगे नैसेक्ना उहाँ स्पष्ट परली ।
कैलारीमा ढेर सामुदायिक वन रहल मने निर्णाय तहमे कम महिला रहल ओरसे एकहुके नैजाइटसम आघे बह्रे नैसेक्ना उहाँ बटैली । कार्यक्रम संचालन दलित महिला अधिकार मञ्च कैलालीके सहजकर्ता निलु चौधरी करल रहिट । कार्यक्रममे मञ्चके रोशनी जैरु, सिमा चौधरीलगायत २५ ठो समुदायिक वनमे आवद्ध रहल अध्यक्ष, पदाधिकारी तथा प्रतिनिधिहुकनके सहभागिता रहल रहे ।
