सुदूरपश्चिम प्रदेश स्तरीय मानव अधिकार, वातावरण अधिकार समुहके बैठक सम्पन्न
पहुरा समाचारदाता
धनगढी, ३० कुवाँर । अनौपचारिक क्षत्र सेवा केन्द्र(इन्सेक) सुदुरपश्चिम प्रदेश कार्यालय, धनगढीके आयोजनामे सुदुरपश्चिम प्रदेश स्तरीय मानव अधिकार, वातावरण अधिकार समुहके बैठक विफेक रोज सम्पन्न हुइल बा ।
इन्सेक सुदुरपश्चिम प्रदेस संयोजक खडकराज जोशी जेनजी आन्दोलन पश्चात मानव अधिकार, वातावरण अधिकार रक्षकहुक्रे आ—आपन सुरक्षासहित सामाजिक न्याय ओ मानव अधिकार तथा वातावरण अधिकारके विषयमे जनप्रतिनिधिसंग समन्वय ओ छलफल करके पालिका ओ वडा कार्यालयसे सेवा सुचारु कैना सहयोग करेपर्ना आवश्यक रहल बटैलै ।
उहाँ अब्बेक विषम परिस्थितिमे अराजक तत्व मौलैटी रहल ओ प्रहरी प्रशासनके मनोबल घटल कारण सुरक्षामे चुनौती रहल ओरसे सावधानीपुर्वक दुरदृष्टिके साथ एकदुसरसंग सूचना प्रवाह ओ समन्वय करटी काम करेपर्ना ओ विवास्पद बाट जथाभावी सामाजिक सञ्जालमे नैपोष्ट्यइना संयोजक जोशी आग्रह करलै ।
अधिवक्ता पुष्पविक्रम शाही इन्सेक लगायतके संस्थासे वातावरणीय प्रभाव सम्बन्धी मुद्दा डारल ओरसे उ मुद्दा उच्च अदालतमे विचाराधिन अवस्थामे रहल ओ अभिनफे समुदायमे वातावरण अधिकार सम्बन्धी घटनासे नागरिकमे परल असरके बारेमे अनुगमन, तथ्य प्रमाण ओ सूचना संकलन करके मानव अधिकार रक्षकहुक्रे वातावणीय प्रभाव सम्बन्धी मुद्दा डारे सेक्ना बटैलै ।
पत्रकार अर्जुन शाह अब्बेक संक्रमणकालिन अवस्थामे पत्रकारहुकनहे समाचारके लाग सूचना संकलनमे व्यक्तिगत सुरक्षामे चुनौती रहल ओरसे सत्यतथ्य सूचना आई नैसेक्के समाचार सम्प्रेषणमे समस्या हुइटी रहल बटैलै ।
मानव अधिकार रक्षक सञ्जालके सचिव इन्द्र्र दानपाली जेनजी आन्दोलनके क्रममे जनप्रतिनिधि तथा राजनितिक नेताहुकनके घरमे आगजनी हुइल कारण महिला जनप्रतिनिधिहुकनहे परिवार, समाज ओ फोनमार्फत टमान धम्की अइटी रहल ओरसे कार्य क्षेत्रमे लौटना डरत्रास ओ मानसिक तनाव हुइल ओ अइना चुनावमे महिला प्रतिनिधि घट्न सम्भावना बह्रल बटैली ।
मानव अधिकार समुहके सचिव कमला चौधरी बेलौरी नगरपालिकामे भौतिक क्षतिी नैहुइलेसेफे जनप्रतिनिधिहुकनहे अभिनसम टमान माध्यमसे दवाव अइटी रहल ओरसे सेवा प्रवाहमे समस्या हुइटी रहल बटैली ।
पत्रकार प्रेम चौधरी कैलारी गाउँपालिकाके पालिकासंगे वडा कार्यालयमे ढेर क्षति हुइल कारण वडा कार्यालयसे डेना आंशिक सेवा पालिकाके कार्यालयसे सुचारु कैटी आइल मने अब्बे सम्बन्धित वडा कार्यालयसे सेवा करेबेर असहजता हुइल बटैलै । जेनसी आन्दोलनसे वडा कार्यालय ध्वस्त बनाइलपाछे स्थानीय नागरिक, अपाङ्गता हुइल व्यक्ति ओ जेष्ठ नागरिकहे सेवा लेनामे समस्या हुइल बटैलै ।
मानव अधिकार समुहके गौरीगंगाके अध्यक्ष टेकराज ओझा गौरीगंगा नगरपालिकामे फोहरके उचित व्यस्थापन नैहुके दुर्गन्ध फैल्के गौरीगंगा नगरपालिकाके—५ राजीपुरके स्थानीय बैठे नैसेक्ना अवस्थामे रहल ओरसे पालिकासंग बारबार छलफल करेबेरफे सुनुवाइ नैहुइल बटैलै । कार्यक्रम मानव अधिकार समुह प्रदेश उपाध्यक्ष नरदिप धामीके अध्यक्षतामे हुइल रहे ।
