मुक्त कमैया महिला विकास मञ्चसे कैलारीहे सहयोग

पहुरा समाचारदाता
धनगढी, ३१ कुवाँर । मुक्त कमैया महिला विकास मञ्चसे कैलारी गाउँपालिकाहे सहयोग करले बा ।

लुथरन विश्व फेडेशन नेपालके आर्थिक सहयोगमे मुक्त कमैया महिला विकास मञ्च धनगढीसे कैलारी गाउपालिकामे सञ्चालित समुदाय सशक्तिकरण तथा स्थानीय पहल परियोजना अन्र्तगत गाउँपालिकाहे सहयोग करल हो ।

गैल भदौ २४ गते जेन्जी आन्दोलनके क्रममे पालिका ओ वडामे हुइल क्षतिके कारणसे जनताहुकनके सेवा प्रवाहमे परे गैल असुविधाके कारण पालिकासे सक्कु पक्ष्यसंग सहयोगके लाग करल अपिलहे कुछ हदसम जनताके सेवामे सहजुल होए कना उद्देश्यके साथ संस्थामे उपलब्ध हुइल श्रोत ओ साधानसे भ्याइटसम सामाग्री कैलारी गाउपालिकाहे हस्तान्तरण करल मञ्चके कार्यक्रम अधिकृत चेतमान साउद जानकारी डेलै ।

मञ्चसे गाउँपालिकाहे ९ थान दराज, ६ ठो टेबुल, १२ ठो अफिस कुर्सी, दुई थान कम्प्यूटर सेट ओ दुई थान प्रिन्टर सहयोग करल हो । मञ्चके अध्यक्ष सीमा चौधरी, संस्थापक अध्यक्ष कौशिला चौधरी, कार्यक्रम अधिकृत चेतमान साउदसे गाउँपालिका उपाध्यक्ष भगवतीकुमारी चौधरीहे हस्तान्तरण करल रहिट । हस्तान्तरण कार्यक्रममे कैलारी गाउँपालिकाके सामाजिक शाखा प्रमुख यगम कलेल, पशु शाखा प्रमुख सुर्यप्रसाद चौधरी, प्रशासन शाखा प्रमुख सोमप्रसाद चौधरीलगायतके सहभागिता रहे ।