“नीति बन्लेसे फेन प्रभावकारी कार्यान्वयन नैहुइल”
पहुरा समाचारदाता
धनगढी, ३१ कुँवार । सुदूरपश्चिम प्रदेशमे नीति बन्लेसे फेन कार्यान्वयन नैरहल सरोकारवालाहुक्रे बटैले बटैं । शुकके रोज धनगढीमे सञ्चार प्रतिष्ठान नेपाल कैलालीके आयोजना हुइल सुदूरपश्चिम प्रदेश लैगिंक समानता तथा सामाजिक समावेशीकरण नीति २०८१ समीक्षा कार्यक्रममे धारणा आइल हो ।
कार्यक्रममे इन्सेक सुदूरपश्चिम प्रदेश कार्यालयमे कार्यरत मैनामोती चौधरी सुदूरपश्चिममे नीतिके अभाव नैहुइल बटैली । ‘सुदूरपश्चिममे नीतिके कमी नैहो । मुक्तकमैया, कमलरीके पक्षामे टमान ऐन बनल बा । मने, कार्यान्वयन हुइल नैहो,’ उहाँ कलि ।
कार्यक्रममे नीतिके बारेमे बहस हुइलेसे फेन उहिनहे कार्यान्वयनमे लैजाइ नैसेकल दलित अधिकार संघ फेडो कैलालीके अध्यक्ष सविना सुनार बटैलि । उन कलि, ‘नीति बनल बा, कार्यान्वयन हुइल नैहो । अइसिक करलेसे समाज कहाँ जाइ हो ?’ अस्टेक, कार्यक्रममे लैगिंक तथा यौनिक अल्पसंख्यक समुदायके तथ्यांक समेत प्रदेशमे नैरहल कटि सुदूरपश्चिम समाजके पुष्पराज पुनमगर आपत्ति जनैले रहैं । उहाँ अपन समुदायके पक्षमे नीति बने नैसेकल उल्लेख करलैं ।
अस्टेक, बालबालिकाके मुद्दामे काम करटि रहल विमला कडायत बालविवाह सम्बन्धी टमान नीति रलेसे फेन प्रभारीकारी रुपसे ओकर कार्यान्वयन नैहुइल बटैलि । उहाँ कानून रलेसे फेन ओइसिन मुद्दा मिलमिलापमे टुंगो लगैना काम हुइल बटैले रहि ।
कार्यक्रममे प्रदेश सांसदहुक्रे नीति तथा कानूनके कार्यान्वयनके प्रयास हुइटिरहल बटैले रहैं । सामाजिक विकास समितिके सभापति धर्मराज पाठक आर्थिक, सामाजिक ओ सांस्कृतिक चेतनाके विकास नैहुइटसम समाज रुपान्तरण नैहुइना बटैलैं । उहाँ नीति जत्रा मजा रलेसे फेन नियत ठिक नैहोके कार्यान्वयनमे समस्या रहल बटैलैं । नीति कार्यान्वयनमे साधान स्रोतहे सदुपयोग करे नैसेकल उहाँ उल्लेख करले रहैं ।
कार्यक्रममे विशेष अधिकारी समितिके सभापति तुलसी देवकोटा एक वर्षमे प्रदेशमे टमान कार्यक्रम हुइल बटैले रहि । नीति बनलपाछे मुक्तकमैया, कमलरीहुकनके दैनिकमे सुधार हुइल उहाँक कहाइ रहे । कार्यक्रममे सांसद लक्ष्मी विक मनैन्के दृष्टिकोण परिवर्तन नैहुइटसम मजा ऐन अइलेसे फेन सुधार नैहुइना बटैले रही । अस्टेक, कार्यक्रममे सांसद ललित सुनार दलित सम्बन्धित ऐनके बारेमे छलफल हुइटिरहल बटैले रहि । सांसद ईन्दिरा गिरी प्रदेश सभामे ऐन बन्ना क्रममे रहल जानकारी करैले रहि ।
कार्यक्रममे सामाजिक विकास मन्त्रालयके सचिव डा. हेमराज रेग्मी बनल सक्कु नीति कार्यान्वयन नैहुइ फेन सेक्ना बटैले रहैं । कार्यक्रमके सहजीकरण करटि उहाँ कार्यक्षमता अनुसार ऐन कार्यान्वयन हुइना बटैलैं । उहाँ प्रदेशमे समावेशीताके बारेमे हुइटिरहल प्रयासमे बारेमे अपन प्रस्तुति करले रहैं । अस्टेक नीतिमे रहल व्यवस्थाबारे अधिवक्ता पुष्पविक्रम शाही प्रस्तुति करले रहैं ।
सञ्चार प्रतिष्ठान कैलालीके अध्यक्ष हेमकर्ण विकके अध्यक्षता हुइल कार्यक्रमके सञ्चालन वरिष्ठ पत्रकार मोनमहन स्वाँर करले रहैं । कार्यक्रममे सांसद, गैरसरकारी निकायमे प्रमुख एंव प्रतिनिधि ओ सञ्चारकर्मीहुकनके सहभागिता रहे ।
