शैक्षिक असल अभ्यास व्यवहारमे लागु करीः गापा उपाध्यक्ष
पहुरा समाचारदाता
धनगढी, ३१ कु्वाँर । कैलारी गाउँपालिकामे समुदाय स्तरीय समावेशी शिक्षा सम्बन्धी संवाद कार्यक्रम सम्पन्न हुइल बा ।
सर्वाङिण अपाङता विकास समाज नेपाल आयोजनामे एकाउन्टविलिटी ल्याव नेपालके आर्थिक सहयोग ओ कैलारी गाउँपालिका शिक्षा शाखाके समन्वयमे शुकके रोज समुदाय स्तरीय समावेशी शिक्षा सम्बन्धी संवाद कार्यक्रम हुइल हो । गाउँपालिका उपाध्यक्ष भगवतीकुमारी चौधरीके विशिष्ट आतिथ्यतामे हुइल कार्यक्रममे कैलारीमे शिक्षा क्षेत्रमे हुइल मजा अभ्यासके व्यवहारमे लागु कैना जरुरी रहल बटैली ।
शैक्षिक गुणस्तर मापण हम्रे कक्षा–८ ओ एसइईके परिक्षाहे हेर्ना करठी, उहाँ कहली ‘शैक्षिक गुणस्तरके बाट करेबेर हम्रे शिक्षक, विद्यालय व्यवस्थापन समिति ओ अभिभावक जिम्मेवार हुई पर्ना जरुरी बा । विद्यार्थीनहे पह्राईमे मजा बनाइक लाग बालविकास थेनसे ध्यान डेहे पर्ना जरुरी हो । छोटिहीसे पह्राई मजा हुइलेसे उप्पर जाके मजा रिजल्ट ल्याने सेक्जाईठ ।
उहाँ कहली, ‘गुणस्तरीय शिक्षा सुधारके ल्यानेक लाग अभिभावक शिक्षामे ध्यान डेना जरुरी बा । अब्बे बालबालिकाहुक्रे विचमे विद्यालय छोरना, लागु औषध दुव्र्यशनीमे फस्ना, बालविवाह, कैना, आत्महत्याके घटना बह्रल बा । अभिभावक शिक्षा प्रदान करलेसे उहीहे न्यूनिकरण ओ चिरफार करेसेक्जाइठ ।
विद्यार्थी भर्ना हुइलपाछे विचमे काहे विद्यालय छोरठै, ओइनके अवस्था का बा विद्यालय व्यवस्थापन समितिसे ध्यान डेहे परठ, उहाँ कहली ।
पहिलेक बनल विद्यालय तथा सरकारी भवन, शौचालय अपााङतामैत्री, बालबालिकामैत्री नैहो ओहोरओर ध्यान डेना जरुरी, यिहीसे आघे गाउँपालिकामे अपाङतामैत्री बोल्ना भाषाके चाटफे टसल उहाँ बटैली ।
वडा वडामे साम्ुदायिक विद्यालयमे छोटछोट बालबालिका अपाङता पहिचान करके सुचिकृत करेलागल ओ उहे अनुसार सेवा सुविधाके व्यवस्था करेलागल उपाध्यक्ष बटैली ।
कार्यक्रममे सर्वाङिण अपाङता विकास समाज नेपालके कार्यकारी निर्देशक नन्दराज भट्ट संस्था परियोजनासे कैलारी गाउँपालिकामे करटी गतिविधि जानकारी डेहल रहिट । परियोजनासे सामुदायिक बैठक, प्रत्यक्ष भेटघाट, टाउन होटल बैठक, फलोअप करल बटैलै । सामुदायिक बैठक आठ चो, प्रत्यक्ष भेटघाट ८० जनहनहे करके सुझाव संकलन करल बटैलै ।
उ अवसरमे पहिचान करल सवालमे विद्यालयमे कौनो ना कौनो बहनामे शुल्क लेहल, मजदुरके बालबालिका विद्यालय बाहेर रहल, गुनासो सुनुवाई पेटिका प्रभावकारी नैहुके बालबालिका शोषणमे परल, बालविवाह, दुव्र्यशन बह्रटी गैल, विद्यालयमे पहुँचयुक्त संरचना नैहुके, शिक्षकसे सम्मानित भाषा प्रयोग नैकरके अपाङता हुइल बालबालिका विद्यालय जाइ नैसेकल ओ जाई नैमानल बटैलै ।
कैलारी गाउँपालिका शिक्षा शाखा प्रमुख गणेश प्रसाद मिश्र शाखासे शिक्षामे संचालन करल गतिविधि जानकारी डेहल रहिट । उहाँ कैलारीमे असल अभ्यास अन्र्तगत विद्यालय समायोजन, शिक्षक दरबन्दी मिलान तथा सरुवा, शिक्षक व्यवस्थापन, भौतिक निर्माण, शैक्षिक सामाग्री वितरण, अतिरिक्त क्रियाकलाप संचालन, अभिभावक शिक्षा सञ्चालन, नियमित प्रअ बैठक, जिआएइज समिति गठन तथा बैठक संचालन करल उहाँ बटैलै ।
कार्यक्रममे वडा नम्बर ५ के वडाअध्यक्ष विष्णु प्रसाद चौधरी, महिला तथा बालबालिका शाखा प्रमुख बालकुमारी चौधरी, शिक्षाका लागि राष्ट्रिय अभियानके अध्यक्ष एकराज बडु, मौसम भट्टलगायत अपन बाट राखल रहिट । कार्यक्रमके संचालन कैलारी गाउँपालिका सामाजिक विकास शाखा प्रमुख यगम कलेल करल रहिट ।
कार्यक्रममे वडा अध्यक्षहुक्रे, टमान शाखाके प्रमुख, अपाङता रहल व्यक्ति, शिक्षक, अभिभावक, विद्यालयके प्रअ, विद्यालय व्यवस्थापन समितिके अध्यक्षह्ुुकनके सहभागिता रहे ।
