हृदय नारायण चौधरीके ‘पेहानी’पोस्टाके घुर्घुट खोलाइ
पहुरा समाचारदाता
बारा, ३१ कुवाँर । थारु आशु कविहृदय नारायण चौधरीके ‘पेहानी’संग्रहके घुर्घुट खोलाइ (विमोचन) हुइल बा ।
थारु कल्याणकारिणी सभा बारा जिल्ला समितिसे कुँवार ३० गते कइगइल सोहरैया ओ छठके अवसरमे शुभकामना लेना डेना कार्यक्रममे नेपाल प्रज्ञा प्रतिष्ठानके प्राज्ञ सभासदस्य डा कृष्णराज सर्वहारी पोस्टाके घुर्घुट खोल्लाँ ।
बकुलिया क्याम्पसमे हुइल कार्यक्रममे डा. सर्वहारी कहलाँ, ‘थारु भासामे पहिला खिस्सा संग्रह, पहिल महाकाव्यके रचियता महाकवि हृदयनारायणसे बारा जिल्लावासी किलनाइ देश भरके थारु स्रस्टा लोग सिख्खा लेहे पर्ना बा ।’ पेहानीमे कवितात्मक शैलीमे सवालजवाफ रहठ, इ अन्सार टे बारा,पर्सा क्षेत्रके सब थारु कवि हुइक चाहि । विडम्वना लावा पुस्ताथारु भासा, साहित्य सँवरनामे नइलागल डेख्के बहुट दुःख लागल उहाँ आगे कहलाँ ।
पोस्टाके सर्जकहृदय नारायण चौधरी अपन जिन्गी थारु भासा, साहित्य सेवामे बिटल कहटि अपन भासाके उन्नतिमे समुदाय अपनेहे लागे पर्ना धारणा रख्लाँ । बारा जिल्लामे थारु भासाहे जबसम पठनपाठन कराइनइ सेक्जाइ, टबसम अपन मनहे सन्तोष लेना ठाउँ नइ रहल कहटि सबजाने थारु पोस्टा लागु करइनामे लागे पर्ना बटैलाँ । थारु कल्याणकारिणी सभाके केन्द्रिय उपाध्यक्ष रहल उहाँ आगे कहलाँ, पोस्टा पह्रके पाठक लोग ज्ञान हासिल करिंट कहिके अपन सबहस पोस्टा निशुःल्क डेटि बटुँ । न कोइ प्रतिक्रिया डेहे, न लावा रचना करे । नयाँ स्रस्टा जन्माइ नाइसेक्के बहुट दुःख लागठ ।’
कार्यक्रममे राष्ट्रिय थारु कलाकार मञ्चके जिल्ला अध्यक्ष जयप्रकाश चौधरी, मञ्चके मधेस प्रदेश अध्यक्ष भुवन चौधरी, थाकस नगर सभापति राजेन्द्र चौधरी लगायत शुभकामना डेले रहिट ।
थाकस बारा जिल्ला सभापति रामप्रसाद चौधरीके घरगोस्याइमे हुइल शुभकामना लेना डेना कार्यक्रममे जिल्ला उपसभापति लक्ष्मीकान्त चौधरीसे स्वागत, सचिव यादवकृष्ण चौधरीसे कार्यक्रम सन्चालन कइगइल रहे । कार्यक्रमके बिच बिचमे प्रमोद चौधरीके टोली, श्याम चौधरी, श्रीदेवी चौधरी, महिमा चौधरी लगायतसे मेरमेरिक गीत, नाच प्रस्तुत कइगइल रहे ।
