बहुभाषिका शिक्षण सम्बन्धी पुनर्ताजगी तालिम

पहुरा समाचारदाता
धनगढी, १ कार्तिक । कैलारी गाउँपालिकाके सामुदायिक विद्यालयके शिक्षकहुकनहे बहुभाषिका शिक्षण सम्बन्धी तीन दिने पुनर्ताजगी तालिम डेहल बा ।

कैलारी गाउँपालिका शिक्षा शाखाके आयोजनामे युरोपियन यूनियनके आर्थिक सहयोगमे सामुदायिक विकास केन्द्र (सि.डि.सी.) डोटी, यूनिसेफ, व्रिटिस काउन्सिलके साझेदारीमे SESP कार्यक्रमअन्र्तगत गुणस्तरीय शिक्षाके लाग सामुदायिक विद्यालयके शिक्षकहुकनहे बहुभाषिक शिक्षण तालिम डेहल हो ।

गाउँपालिका उपाध्यक्ष भगवतीकुमारी चौधरीके प्रमुख आतिथ्यतामे हुइल तालिम समापन कार्यक्रममे उहाँ गुणस्तरीय शिक्षाके लाग शिक्षक, अभिभावक, विद्यालय व्यवस्थापन समितिके समन्वय ओ सहकार्य जरुरी रहल बटैली ।

उहाँ कहली, गुणस्तरीय शिक्षा नैहुइल, विद्यार्थी फेल हुइलै, कम्जोर हुइलै कहिके हम्रे शिक्षकहे जनप्रतिनिधिहे दोष डैखैना कैठी मने हम्रे आदर्श अभिभावकके जिम्मेवारी निभैले बटी की नै एक पटक सोचेपर्ना जरुरी बा । बालबालिकाके भविष्य सुधार कैना घरपरिवारसे शिक्षा संस्कारके बाट सिखाई पर्ना विल्गाइठ ।

कैलारी गाउँपालिकासे गुणस्तरीय शिक्षा प्रदान करेक लाग शैक्षिक असल अभ्यास अपनाइल बटैटी सक्कु जाने आ–आपन ठाउँसे सामाजिक उत्तरदायित्व बहन करेपर्ना गाउँपालिका उपाध्यक्ष बटैलै ।

विद्यार्थीनहे जटरा ढेर भाषा, विधि, प्रविधिसे शिक्षण कराई सेक्लेसे ओटरा मजा ओ सिकाईमे सहजता हुइनाफे उहाँ बटैलै ।
सामुदायिक विकास केन्द्र (सि.डि.सी.) डोटीके कार्यकारी निर्देशक हेमराज जोशी सक्कु जानेक एक लक्ष्य गुणस्तरीय शिक्षा प्रदान करके विद्यार्थीके सिकाई प्रद्धति सहज ओ सरल बनैना रहल बटैलै । पहाडसे जनसंख्या तराई झरल जस्टे सामुदायिक विद्यालयसे विद्यार्थी संस्थागत विद्यालयमे जैटी रहल अवस्थामे गुणस्तरीय शिक्षा प्रदानके लाग सक्कु अर्जुन दृष्टिके साथ लागेपर्ना बटैलै ।

तीन दिनसम बहुभाषिका शिक्षण सम्बन्धी पुनतर्जगी तालिममे प्रशिक्षण व्रिटिस काउन्सिलके तेज रिमाल, लालझाँडी गाउँपालिकाके शिक्षा शाखा प्रमुख सिद्धराज भट्टसे प्रशिक्षण डेलै ।

तालिममे प्रारम्भिक कक्षा १ से ३ के बालबालिकाके पठनसीप तथा आधारभूत गणितिय सीप विकास करटी सिकाई उपलब्धी बृद्धि करैना, दिगो सिकाई तथा सहज सिकाईके लाग क्रियाकलापमे आधारित रहल सिकाई सहजीकरण कैना, कौशल कला, बहुभाषिक सिकाई, रणनीतिक अर्थात बालबालिकाके मातृभाषाहे सिकाई सहजीकरणके माध्यमके भाषा बनाके सिखैना, स्थानीय स्रोत सामाग्रीके निर्माण ओ प्रयोग मार्फत सिकाई सहजीकरण विधि प्रक्रिया अपनाइल रहे । तालिम समापन कार्यक्रम सि.डि.सी डोटीके कार्यक्रम संयोजक तिलक चौधरी करल रहिट ।

तीन दिन हुइल तालिममे सि.डि.सि डोटीके शिक्षा अधिकृत खगेन्द्रराज जोशीलगायत ११ जाने शिक्षक, १७ जाने शिक्षिका करके २८ जानेक सहभागिता रहल रहे ।