प्रदेश सुरक्षा समितिके बैठक सम्पन्न

पहुरा समाचारदाता
धनगढी, २ कार्तिक । सुदूरपश्चिम प्रदेशके मुख्यमन्त्री कमलबहादुर शाहके विशेष उपस्थिति ओ आन्तरिक मामिला तथा कानून मन्त्रालयके मन्त्री हिरासिंह सार्कीके संयोजकत्वमे अँटवारके रोज प्रदेश सुरक्षा समितिके बैठक टमान निर्णय करटी सम्पन्न हुइल बा ।

२०८२ साल फागुन २१ गतेके लाग घोषित प्रतिनिधिसभाके निर्वाचनके लाग एकिकृत सुरक्षा रणनीति तयार करके आम नागरिकमे सुरक्षाके प्रत्याभुति हुइना करके आवश्यक व्यवस्था मिलैना निर्णय करले बा । सुदुरपश्चिमसे भारत जैना मुख्य नाकामे डेवारी ओ छठ पर्वके बखत हुइ सेक्ना लुटपाटके घटना तथा भारत जैना ओ अइना नागरिकहुकनके आवागमनहे सहज बनैना एवं नाकामे हुइना अन्य अपराधिक गतिविधिहे नियन्त्रण कैना सुरक्षा निकायसे एकीकृत जाँचके व्यवस्था मिलैना निर्णय करल बा । लागुऔषध विक्री वितरण एवं ओसारप्रसारके गतिविधिहे नियन्त्रण ओ नियमन कैना सरोकारवाला निकायसे संयुक्त रणनीति तयार करके ओकर कार्यान्वयन कैना आवश्यक निर्देशन डेना निर्णय करल बा ।

डेवारी ओ छठ पर्वके समयमे बजारमे हुई सेक्ना अस्वभाविक गतिविधि (जस्टेः मुल्यवृद्धि, अखाद्य वस्तुके मिसावट, म्याद नाघल खाद्यवस्तुके विक्री) नियमन कैना सम्बन्धित निकायसे अनुगमन तथा मुल्याकंन प्रभावकारी बनैना सम्बन्धित निकायहे निर्देशन डेना कहल बा ।

सार्वजनिक सेवा प्रवाहहे सरल, सहज ओ जनआकांक्षा अनुरूप बनैनाके साथे सुशासन कायम करेक लाग सक्कु सार्वजनिक निकायसे सेवाके सरलीकरण ओ सबलीकरण एवं संस्थागत सुदृढीकरण कैना निर्देशन डेना निर्णय हुइल बा । बैठकमे कैलालीके प्रमुख जिल्ला अधिकारी कृष्णप्रसाद लम्साल, कञ्चनपुरके प्रमुख जिल्ला अधिकारी लक्ष्मण ढकाल, प्रहरी नायब महानिरीक्षक ओम बहादुर राना, महाशाखा प्रमुख कोमल प्रसाद ओझा, नेपाली सेना, सुदूरपश्चिम पृतना हेडक्वाटर, तेधरीके पृतनापति उपरथी किरण केसी, स.प्र.बल नेपाल, नं. ७ वैद्यनाथ वाहिनी मुख्यालय, अत्तरिया स.प्र.ना.म.नि. प्रदिप कुमार पाल, नेपाली सेना, सुदूरपश्चिम पृतना हेडक्वाटर, तेघरी, कैलालीके महासेनानी ईश्वर बुढाथोकी, राष्ट्रिय अनुसन्धान सु.प. प्रदेश कार्यालय, धनगढीके सह अनुसन्धान निर्देशक नगेन्द्र प्रसाद दहाल, मुख्यमन्त्री तथा मन्त्रीपरिषद्के कार्यालयके उपसचिव नवराज ओझा लगायतकाके उपस्थिती रहल रहे ।