मलामी बोकल ट्याक्टर दुर्घटनामे तीन जानेक मृत्यु

पहुरा समाचारदाता
धनगढी, २ कार्तिक । कैलालीमे मलामी बोकल ट्याक्टर दुर्घटना हुके ३ जानेक मृत्यु हुइल बा ।

बर्दगोरिया गाउँपालिका–४ से चिसापानीओर जैटी रहल सुदूरपश्चिम प्रदेश ०१००२ त ४९५१ नम्बरके ट्याक्टर लम्कीचुहा नगरपालिका अन्तर्गत पर्ना धोबेनी खोलामे अनियन्त्रित हुके विल्टेबेर उ दुर्घटना हुइल हो ।

जिल्ला प्रहरी कार्यालय कैलालीके प्रहरी नायब उपरिक्षक राजकुमार सिहंके अनुसार दुर्घटनामे परके १२ जाने घाहिल हुइल बटै ।

दुर्घटनामे परके बर्दगोरिया गाउँपालिका–४ के ६४ वर्षीय दानबहादुर साउद, ३४ वर्षीय हर्क साउद ओ १६ वर्षीय शीतल साउदके घटनास्थलमे मृत्यु हुइल हो ।

घाहिलुकनके लालरत्न अस्पताल लम्कीमे उपचार हुइटी रहल सिहं बटैलै । प्रहरीके अनुसार ट्याक्टरमे मलामी लेके चिसापानीओर जाईबेर अनियन्त्रित हुके ट्याक्टर विल्टल प्रारम्भिक अनुसन्धानसे बुझल बा ।