डसियासे डेवारीसम ११३ दुर्घटना
पहुरा समाचारदाता
धनगढी, १२ कार्तिक । सुदूरपश्चिम प्रदेशमे डसिया डेवारी अवधिमे सडक दुर्घटनामे परके २१ जानेक ज्यान गैल बा ।
एक महिनाके अवधिमे सवारी दुर्घटनामे २१ जाने ज्यान गैल हो । प्रदेश ट्राफिक प्रहरी कार्यालय अत्तरियाके अनुसार कुवाँर ६ गतेसे कार्तिक ७ गतेसम प्रदेशभर ११३ ठो सवारी दुर्घटना हुइल बटै । जेम्ने ढेरके ज्यान गैल हो कलेसे २२८ जाने घाहिल हुइल जनाइल बा ।
चाडपर्वके बेला मादक पदार्थ सेवन करके तीव्र गतिमे सवारी साधन चलैना करल कारण ढेर दुर्घटना हुइना करल बा । सवारी साधन चलाईबेर कैना सामान्य लापरवाहीके कारणफे भारी दुर्घटना हुइना करल ट्राफिक प्रहरीके कहाई बा ।
दुर्घटना न्यूनीकरणके लाग ट्राफिक प्रहरीसे सडक सुरक्षा सम्बन्धी जनचेतनामूलक कार्यक्रमफे करल रहे । एक महिनाके अवधिमे ४१७ ठो जनचेतनामूलक कार्यक्रम आयोजना करल प्रदेश ट्राफिक प्रहरी कार्यालयके सूचना अधिकारी प्रहरी नायब उपरीक्षक टेक जोेरा जानकारी डेलै । उहाँके अनुसार उ कार्यक्रमसे ११ हजार ९२३ जाने लाभन्वित हुइल बटै ।
प्रहरीके जनचेतनामूलक कार्यक्रमके बाबजुद मनै मादक पदार्थ सेवन करके लापरवाहीपूर्वक सवारी साधन चलैना करल बटै । आसिक सवारी साधन चलाईबेर ढेर दुर्घटना हुइना करल बटाइल बा । डसिया, डेवारीमे मादक पदार्थ सेवन करके सवारी साधन चलैना २४२ जनहनहे ट्राफिक प्रहरीसे कारबाही करले बा । उहीसे एक लाख ३४ हजार राजस्व सङ्कलन हुइल सूचना अधिकारी जोरा जानकारी डेलै ।
गैल आर्थिक वर्षमे डसिया, डेवारी अवधिमे ट्राफिक प्रहरीसे ट्राफिक नियम उलङ्घन करके सवारी साधन चलुयया दुई हजार ५७५ जनहनहे कारबाही करल रहे । ओइनहे २० लाख नौ हजार राजस्व सङ्कलन हुइल जनाइल बा ।
