चैतन्य पाठशालासे रक्तदान कार्यक्रम

पहुरा समाचारदाता
धनगढी, १५ कार्तिक । कैलालीके धनगढी उपमहानगरपालिका–५ शिवनगरमे रहल चैतन्य पाठशालाके आयोजनामे रक्तदान तथा निशुल्क स्वास्थ्य चेकजाँच शिविर सम्पन्न हुइल बा ।

कार्यक्रम कै“रक्तदान जीवनदान, मानव सेवाके लाग चैतन्य अभियान “ कना नारासहित शनिच्चरके रोज चैतन्य पाठशालामे वृहत रक्तदान कार्यक्रम सम्पन्न हुइल हो । विद्यालयके रक्तदान अभियान कार्यक्रमके संयोजक तथा सुदूरपश्चिम सरकारके स्वास्थ्य दूत दीपक उपाध्यायके संयोजकत्वमे २९ जाने रक्तदाताहुक्रे रक्तदान करले बटै । ओस्टेक करके निःशुल्क स्वास्थ्य शिविरफे संचालन करल विद्यालयके विद्यालयके निर्देशक कटकबहादुर सिंह जनैलै ।

नेत्रेश्वरी हेल्थ एण्ड होम केयरके प्राविधिक सहयोगमे अभिभावक, विद्यार्थी, पत्रकार तथा स्थानीयहुकनके स्वास्थ्य परीक्षण कैगिल रहे । कार्यक्रमसे विद्यालयमे सामाजिक उत्तरदायित्व ओ मानवीय सेवाप्रति जागरूकता अभिवृद्धि कैना सहयोग पुगल सहभागीहुक्रे बटैले बटै । चैतन्य पाठशालासे प्रत्येक बरस रक्तादान तथा निशुल्क स्वास्थ्य जाँच कार्यक्रम आयोजना करटी आइल बा ।