महिला उद्यमी शनिवारिय मेला सुरु
पहुरा समाचारदाता
धनगढी, १५ कार्तिक । धनगढीमे शनिच्चरके महिला उद्यमी मेला सुरु हुइल बा । गैल बर्ष अगहन १ गतेसे सुरु हुइल शनिवारिय महिला उद्यमी मेला बर्खामे स्थगन हुइल रहे । मने फेरसे शनिच्चरके रोजसे विधिवत कार्यक्रमके विच सुरु करल हो ।
धनगढी उप–महानगरपालिकासे प्रत्येक शनिबारके रोज संचालन हुइना शनिबारिय महिला उद्यम बजारके उदघाटन सुदूरपश्चिम प्रदेश सरकार भूमि व्यवस्था कृषि तथा सहकारी मन्त्रालयके माननीय मन्त्री वीरबहादुर थापा करल रहिट ।
उदघाटन कार्यक्रममे मन्त्री थापा महिलाके सीप ओ उत्पादनहे बजारसम पुगैना ओ ओइनके आत्मबल वृद्धि कैना उद्देश्यसे यैसिन मेला आयोजना कैना उपमहानगरपालिकाके सराहनीय पहल हुइल बटैलै । उहाँ कहलै, “महिलाहुकनके सीपहे बजारसम पुगैना, ओइनहे आर्थिक रूपमे सबल बनैना ओ आत्मनिर्भर बनैना कार्यमे यी मेलासे महत्वपूर्ण भूमिका खेली ।”
‘शनिवारिय महिला उद्यामी मेला’के आयोजना करके उप –महानगरसे गृहणी महिलासे अपनेसंग रहल कला सीपसे बनल हस्त सामाग्री ओ घरमे पकाई सेक्ना मिठ पक्वानहे बेचके आम्दानीके स्रोत बृद्धिके लाग बजार स्थापित करडेहल मेयर गोपाल हमाल बटैलै ।
आर्थिक रुपमे महिलाहे शसक्तीकरण कैना उद्देश्य रहल यी मेलामे कौनो महिलासे अपन स्टल बुकिंग करके शनिच्चरके दिन अपन घरमे उत्पादित हुइना कौनोफे समान बस्तु ब्यपार करे सेक्ना मेयर हमाल बटैलै ।
धनगढी उपमहानगरपालिकाके उप–मेयर कन्दकला कुमारी राना महिला सशक्तीकरण ओ स्वरोजगारहे प्राथमिकता डेटी शनिवारे महिला उद्यम बजारके सुरुवात करल बटैली । उहाँ कहली, “यी बजार महिलाके सीप ओ परिश्रमहे आर्थिक अवसरमे रूपान्तरण कैना मञ्च हो ।
यहाँ धनगढीमे बसोबास कैना महिलाहुक्रे अपन सीपअनुसार उत्पादन करल सामग्री ओ परिकारके बिक्री–वितरण करे सेक्ठै ।” उप–मेयर राना मेलासे सीप हुइल महिलाहे घरमे बैठेपर्ना बाध्यताके अन्त्य करटी, ओइनहे आत्मनिर्भर बनैना दिशामे योगदान पुगैना विश्वास व्यक्त करली ।
